Austin Reaves hoin Lakers an chak

Los Angeles Lakers inngahna Luka Doncic chu nimin zing NBA regular season khelhah, a kawngah harsatna a neih avangin inlan lo mah se Austin Reaves-a'n a hmun ruak a luah khat hneh a, 121-116 a Detroit Pistons an hnehnaah point 43 zet a score.

First quarter aṭangin Lakers an chungnung nghal a, Reaves-a'n point a neih bakah a ṭhiante tan hmun awl a siamsak nghal. American point guard hi a ṭhianten an thlawp ṭha a, defence-ah an ṭan khawng avangin, 38-14 in first quarter an khar.

Second quarter-ah erawh Pistons an insiamṭha a, Daniss Jenkins leh Kevin Huerter te hoin point 34 an sual chhuak a, Lakers erawhin point 23 chauh an score thei thung.

Third quarter leh fourth quarter-ah pawh Pistons-in point an ngah zawk a, Jenkins leh Huerter bakah Cade Cunningham leh Duncan Robinson ten inkhel tir lam aiin hma an sawn.

Mahse Lakers-in Reaves an nei a, defender venna hnuaiah pawh a chhanglet thei zel. First quarter-a point an score tlem chu Pistons-in a tawpah an tuar a, point nga chauha inthlauin an chak lo.

Kum 28 mi Reaves hi Ziaire Williams, Collin Sexton (17 pts), Quentin Grimes leh Walker Kessler (12 pts) ten an thlawp ṭha a, Kessler hian rebound vawi 16 zet a la bawk. Jarred Vanderbilt chuan point hnih chauh nei mah se, rebound vawi 10 zet a lak avangin an chak nan a thawh hlawk hle.

Inkhelah banah Reaves chuan, "Third quarter kan khel chhia tih chu zep rual a ni lo a, mahse kan khingpuite chet ṭhatna khan min ti hnual lo a, chu chu kan chakna hnar a ni. Ka ṭhiante an khel ṭha takzet a, an rilru put hmang a dik hle. Doncic lo let leh hunah phei chuan hei ai hian kan ṭha lehzual ang," a ti.