Brazil-ah Norris a tlan chak ber

Season hmasaa Formula 1 champion Lando Norris chu Pathianni zana Brazilian Grand Prix-ah um phaktu an awm lo a, British driver hi tun season-a vawi thum a chakna chiah a ni bawk.

Autódromo José Carlos Pace-a intlansiakah champion zo hlim Andrea Kimi Antonelli-a'n hma a hruai nghal a, mahse Mercedes driver hi lap 20-naah chesualin track pawnah a chhuak a, Norris-a'n hmahruai nghalin a tawp thlengin lehpeltu an awm tawh lo.

Antonelli chetsual hma chiah hian lap 17-naah a teammate, George Russell chu 'pit' a panna lamah a kual sual avangin a vir kual a, Silver Arrows driver pahnih vanneih ṭum a ni lo.

Kum 26 mi Norris chuan, "Khaw awm dan avangin chetsual a awl a, driver dangin beisei an phak loh chhan a ni. Chutihrualin ṭha takin ka tlan tluan thei a, ka intlansiak tawh zingah ka chet ṭhat berte zinga chhiar tlak a ni," a ti.

Norris hi driver's table-ah point 246 hmuin parukna a ni mek a, Antonelli champion tawh mah se pahnihna Max Verstappen nen point 33 chauh an inthlauh avangin, intlansiak pathum la awm turah pahnihna dinhmun a la beisei ngam. Chutihrualin Norris hi a chet ṭhat bakah midang chetsual a chân ve a ngai tawh dawn.

Red Bull driver te erawh an che ṭha a, Verstappen chu pahnihnaa thlengin, Isack Hadjar chu pathumna a ni thung a, podium an lawn ve ve. Mercedes driver te chesual mah se an beidawng lo a, Russell chu palina niin a hnung chiahah Antonelli a thleng ve bawk.

Brazilian GP-ah hian Ferrari-in beisei an pha lo a, Charles Leclerc chu pariatna niin veteran driver Lewis Hamilton chu pakuana a ni ve bawk. Driver pahnihten point an hloh hnem avangin, a sang thei ang ber thlen an tum a nih chuan an chetsual a thiang tawh lo.