Pahnihnaah Lille an chho

French club hlun Lille chuan Pathianni zan khan khualmualah 2-1 in Rennes an hneh a, table-ah pahnihnaah chhoin hmahruaitu Paris St-Germain an hnaih ve zel.

Lille tan Soriba Diaoune chuan minute 24-naah goal hmahruai a khung a, mahse mual neitu team tan Boulaye Dia chuan a chhang let ve nghal. Second half-ah mikhual team tan Nathan Ngoy-a'n an hmahruaina goal a khung leh a, Rennes-in a chhan letna tur an nei tawh lo.

Kum 2020-21 season khan Lille hian Christophe Galtier hoin kum 10 hnua a vawi khatna atan Ligue 1-ah an champion a, hei hi an nomawi chawi hnuhnung ber a ni zui.

Kuminah Carlo Ancelotti fapa Davide Ancelotti enkawlna hnuaiah Lille hian beiseina sang tak an nei a, mahse champion lai PSG an awm avangin inthlahdah thei an ni lo a, team lian zawk barakhaih thei tur khawpa an khelh ṭhat a ngai ang.