Hong Kong-ah Sindhu leh Saina

Badminton inelna ngaihhlut zinga pakhat Hong Kong Open-ah PV Sindhu leh Saina Nehwal an inlan dawn a, tunkar chhunga inelna neih turah hian Indian nula pahnih hian chet ṭhat theih an inbeisei.

Tun hnaiah Saina leh Sindhu hi tournament an khelh hoah an che fuh hlei thei lo, match hmasa berah an tlak fo bakah semifinal thlen pawh an nei ngai meuh lo. An sulhnu ṭha lo thai reh nan Hong Kong-ah beiseina sang tak nen an inlan dawn a ni.

Kar hmasa lawka Sindhu hneh loh Pai Yu Po chu tun ṭumah hian Saina nen an inhmachhawn ve thung dawn a, atan khingpui awlsam lo tak a ni ang. Mipa singles lamah Kidambi Srikanth hna a hautak dawn. India tlangval hi world number 1 ni lai leh tun hnaia khel ṭha tak Kento Momota nen an inhmachhawn nghal dawn a ni.