India leh Maldives inkhel dawn

SAFF Championship khelh mekah India chu vawiin tlai dar 3:00 hian an inlan dawn a, Maldives nen an inkhel dawn–Blue Tigers hian match hmasa zawkah Pakistan chu 3-2 in an hneh tawh a, Maldives hi an draw ringawt a nih pawhin semifinal an lut tawh ang.

Mahse, India hi an buai ru hle–senior team pakhat zawk, Khalid Jamil-a kaihhruai chuan New Zealand-ah tour an nei mek a, SAFF-ah hian India Under-23 coach Naushad Moosa hoa inlanin, India U15 coach Bibiano Fernandes chuan a pui bawk.

Moosa kaihhruai team an la nau a, hetihrual hian player ṭhenkhat a kohin squad an zawm theih loh bakah, Mumbai City player pathumte chu AIFF nen an inrem sa angin India lamah an lo haw tawh.

Mizo defender Hmingthanmawia Ralte (Valpuia) pawhin India tan Pakistan hmachhawn mah se, club lamin an koh kir avangin India lamah a lo haw tawh a, Valpuia bakah Mumbai player dang Farukh Choudhary leh Noufal PN te chu koh kir an ni bawk.

Hetihlai hian FC Goa centre back Ronney Kharbudon leh Bengaluru midfielder Suresh Singh ten hliam vangin squad an zawm lo a, Bijoy Varghese, Muhammad Suhail, Tomba Singh leh Liston Colaco te chuan New Zealand-a tour nei India squad an zawm leh bawk–India an buai hle.

Mahse, Blue Tigers tan draw result chauh pawh a tawk avangin Maldives lakah harsatna a awm lo tura ngaih a ni.