Clippers lakah Raptors an tlawm

Nimin zing NBA regular season inkhelah Toronto Raptors chu Los Angeles Clippers lakah 99-88 in an chak lo. Season kal laia a vawi kua nan Golden State Warriors chu an chak lo ve bawk.

Inkhel tir lamah Kawhi Leonard che fuh tawk lo mah se a hunah tak a rah chhuak, season hmasa Raptors champion puitu Leonard hian rebounds vawi 11 a lak bakah assist vawi kua a nei a, an khingpuite ball vawi thum a chhuhsak bawk chu hnehna an chan nan a pawimawh hle.

Inkhel dangah James Harden-a point 39 leh Russell Westbrook-a point 26 hmangin Houston Rockets chuan New Orleans Pelicians chu 122-116 in an hneh a, tun hnai an match hnuhnung paliah hnehna an chang vek. Tun season NBA match 10 an khelh tawhah Harden hian point 373 a nei der tawh a, kum 1967-a Rick Barry-a'n point 381 a neih hnuah a tir lam match 10 chhunga point nei hnem leh ber a ni.

Stephen Curry awm lohna Golden State Warriors an la che fuh thei lo, nimin zing khan Utah Jazz lakah 122-108 in an chak lo a, tun season chhungin vawi kua zet an tlawm tawh a, ṭum hnih chauh hnehna an la chang. GSW hian hliam vangin Curry an chhawr thei lo a, American guard hi kumin chhungin a inkhel thei dawn lo. Curry chuan, "Tuna ka ban hliam ang hi tun hmain ka la tawk ngai lo, inkhelh leh ka chakin ka nghakhlel tawh, a hun tur erawh ka la sawi thei lo," a ti.