Aurangabad-ah Hmeichhe National Boxing

10th Elite Women’s National Boxing Championship 2026 chu Guwahati-a neih turin ruahmanna awm vek tawh mah se Boxing Federation of India chuan Aurangabad, Maharashtra-ah a sawn. Inelna hi December 15-20, 2026 chhunga neih tur a ni.

Inelnaah hian category 10 a awm a; chungte chu 45-48, 48-51, 51-54, 54-57, 57-60, 60-65, 65-70, 70-75, 75-80 leh +80 kgs te a ni. Category 10 a awm avangin state/team khatin boxer 10 zel an tir thei ang.

World Boxing Technical & Competition Rules hman tur a ni a, round thum khelh tur a ni a, round tin hi minute thum niin round tin inkarah hian minute khat zel chawlh a ni ang. Boxer-te hi January 1, 1986 leh December 31, 2008 inkara piang chin an ni tur a ni.

Team tel turte hian player tel tur zat hi November 24, 2026 hmanin BFI hnenah an hriattir tur a ni a, December 1, 2026 hma ngeiin hming nen an hriattir tur a ni bawk. Mizoram Boxing Association (MIZBA) lamin Mizoram aiawh tur hi an la thlang lo a, MIZBA hruaitute hian a rang lama an thlan tur thu Vanglaini an hrilh.