Zaninah Inter Village Futsal semifinal

MBOCWWB MFA Inter Village Futsal Tournament-ah team pali chauh an dam ta. Zanin dar 6:00 hian R. Dengṭhuama Indoor Stadium, Mualpuiah Aizawl Venglai leh Sihphir Venghlun te an inkhel ang a, dar 8:00-ah Zemabawk North leh Reiek te an inkhel zui ang. Inkhel hi BR Studio YouTube channel aṭangin a en theih bawk ang.

Aizawl chauh ni loin Mizoram hmun hrang hrangah futsal ground a tam a, team telte pawh an intluk tawk hle. Champion rinkai Electric Veng pawhin semifinal an thleng zo lo a, semifinal-ah Zemabawk North an hneh lo. Quarterfinal match hmasa berah futsal hmuhnawm chhawp chhuah a ni a, Zemabawk North tan tawnhriat nei ṭha Peter Lalrinhlua a pawimawh hle.

Zemabawk North lamin Zemabawk Undivided an lantir a, an veng ṭhenawm Zemabawk player Vanlalhnehthanga sunna hun an hman bakah an chakna hi a tan an hlan. Tun ṭum inelnaah hian Ahneha hi Zemabawk tan a inlan a, captain ni nghe nghein Thawhṭanni zing khan chetsualna vangin a thi a ni.

Inkhel dangah inbuatsaihna nei ṭha Aizawl Venglaiin an thawhrim rah an seng zel a, Sakawrtuichhun lakah 3-2 in an chak hram. Muthi leh Sihphir Venghlun te rinlawk ang ngeiin an inhnehtawk a, 3-3 a an inhnehtawk hnuah Sihphir Venghlun penalty shootout-ah an vannei ta zawk. Reiek-in futsal hmangin hming an chher chho a, Saikhamakawn lakah 4-3 in an chak.

Semifinal-ah AMC huam chhung team hnih leh AMC pawn team hnih an inkhel dawn. Aizawl Venglai leh Sihphir Venghlun te hi inelna ṭantirh aṭanga champion rinkai ni phak an ni a, chak tur hriatthiam a har. Inbuatsaihna nei ṭha Zemabawk North leh Reiek te pawh hi inkhel tawk viau tura ngaih an ni.