Infantino elpui tur Arsene Wenger?

Arsenal manager hlui Arsene Wenger chuan FIFA president thlan thar leh turah din a tum a, President dinhmun luah mektu Gianni Infantino paihthlak a tum dawn niin khawthlang chanchinbute chuan an tarlang.

Kum 77 mi Wenger hi tun hnaiah FIFA president chuh tura duhtu an tam a, social media leh hmun hrang hrangah an auchhuahna hmuh tur a tam hle. Tunah chuan Wenger hian he hna hi chelh ngei a tum hmel ta.

Chutihrualin Wenger hi a kum a upa ve tawh a, football tan rei tak hna a thawk thei ang em, tih chu zawhna awm mek a ni bawk. Mahse, Infantino laka lungawi lohna a tam avangin, term khat tal pawh President turin mipuiin an duh nia sawi a awm.

Swiss pachal Infantino hian World Cup chu mimal kutah hralh a tumna avangin football fans tam tak an thinrim a, nakkum March-a inthlan leh turah pawh Europe-ah a tla na tawh lo hle.

Mahse khawvel hmun hrang hrangah ṭantu a la ngah a, South America, Africa leh Asia lamah thlawptu a la ngah avangin sawiselna tam mah se President chuh ngam an awm meuh lo.

November 18, Nilaini thleng hian President atana candidate te hming thehluh hun hawn a ni a, Tottenham Hotspur defender hlui Ramon Vega chu hming pe lut hmasa ber niin, Japanese Football Association president Kozo Tashima a awm tawh bawk. Wenger hian a hming a theh lut a nih chuan palina tur chiah a ni.