Raul-a'n Real Oviedo enkawl dawn

Real Madrid striker hlui Raul chuan Spanish second division club Real Oviedo a enkawl dawn a, Spanish striker hlui Oviedo tan hian June 2028 thleng châm turin contract a ziak.

Oviedo hi season hmasa khan La Liga aṭangin an relegate a, second division lamah pawh beisei an phâk lo chhunzawm avangin Thawhṭanni khan an manager Julian Calero chu an ban. A thlaktu tur zawng nghalin Raul hi an duh ber.

Kum 49 mi Raul chuan, "Squad-a talent awm dan a zirin team khelh dan tur leh enkawl dan hi a danglam ṭhin a, mahse thawhrimna hi a pawimawh ber a, chu chu kei pawhin ka beisei dawn. He team hian fans te lawmna siam turin a tir aṭanga a tawp thlengin theihtawp an chhuah tur a ni a, kei pawhin theihtawp ka chhuah ang," a ti.

Schalke tan pawha khel tawh Raul hian 2019 leh 2025 inkarah khan Real Madrid reserve team a lo enkawl tawh a, mahse senior team a la enkawl ngai lo–Real Oviedo hi a career-a club pangngai a kaihhruai hmasa ber tur a ni.

Oviedo hi second division-ah match 13 khel tawhin 13-naah an awm mek a, hmahruaitu Castellon nen point 27-in an inthlau mek. Raul hian a club thar hi La Liga-ah a rang thei ang bera hruai kir a tum dawn.