FIA President-in kum bithliah paih a duh

Lirthei hmanga inelna hotu lu Fédération Internationale de l'Automobile (FIA) president Mohammed Ben Sulayem chuan, FIA hruaitu atana kum bithliah chin awm chu tihtawp a duh a, December thlaa FIA inthlan awm turah hian a duh dan hi kalpui a ni dawn em tih a hriat chauh ang.

FIA chuan presidential team-ah hian kum 75 pel tawh awm a remti lo a, Ben Sulayem hi kum 64 mi a nih ve tawh avangin a rei thei ang ber a nihna chelh a duh vang nia sawi a tam a, a ngaihdan ṭawmpui lotu an tam hle.

Kum 2023 khan Ben Sulayem hian kum 75 chu 70 chinah tihhniam a lo rawt tawh a, mahse hei hi khatihlaia amah el pha ber tura ngaih MotorsportUK-a an hotupa, David Richards (kum 71) paihthlak a duh vang niin a lang.

Mahse, Ben Sulayem chuan a rawtna chu an pawlin hma an sawn theihna atan a ni a, kum upa lutukin an kaihhruai chuan hmasawnna lamah an tlakhniam a hlauh thu a sawi ve thung.

December 12, Inrinni zan hian Shanghai, China-ah FIA inthlanpui hi neih a ni leh dawn a, mi tam takin Emirati pachal Ben Sulayem hi tling nawn turin an duh tawh lo a, an rorel tawh dan thlirin mi thar an duh tawh zawk.