Brazilian GP-ah Wolff inlan dawn lo

Tunkar tawp hian Formula 1 Brazilian Grand Prix tlan a ni dawn a, intlansiakna neihna hmunah hian Mercedes Formula 1 boss Toto Wolff chu a inlan ve thei dawn lo.

Wolff hian 2013 khan Mercedes team hi a zawm a, a hnu lamah chuan inelna an neih apiangin a hmunah a kal ziah - tun ṭum hi a tel loh vawi khatna tur a ni. South America khawmualpuia a kal loh chhan hi Europe lama tih tur dang a la neih vang a ni.

Technical director James Allison kaihhruaina hnuaiah Mercedes an inlan dawn, team boss Wolff chuan amah awm dawn lo mah se a team leh driver-te chu ṭha taka intlansiak hmachhawn tura a duhsak thu a sawi. Wolff chuan, "Kan thlen chinah hian duhtawk sawi theih a ni lo, inelna kan hmachhawn apiang hian hmasawnna tur a awm zel. Team leh driver champion chu kan ni tawh ngei mai, mahse hei hi a la tawk lo.

"Season kal laiah intlansiak pahnih hma-chhawn tur kan la nei, hengah te hian a ṭha thei ang bera chet kan tum tur a ni ang. A sang thei ang bera awm chungin hun tawp hman kan tum tur a ni," tiin a sawi.