Brady leh Birmingham an inṭhen

Championship club Birmingham City chuan NFL legend Tom Brady nen an thawhdunna a tawp thu an tarlang a, English club leh Brady te inṭhen chhan hi tarlan a ni lo thung.

Birmingham chuan, "Birmingham City Football Club chuan kum thum chhung ṭha taka hna a lo thawh tawhnaah Tom Brady chungah thinlung takin lawmthu kan sawi a, ani ang infiamna huanga mi langsar leh tawnhriat ngah kan thawhpui thei hi ropui kan ti a, kan theihnghilh tawh ngai lo ang," tiin thuchhuah an siam.

Kum 49 mi Brady hian February 2023 khan kum 23 hnuah NFL a chawlhsan a, hemi kum vek August khan Birmingham-a 3.3% share leiin, club neitu Knighthead Capital Management LLC zingah a tel a, advisory board-ah chairman a ni bawk.

Superbowl ring paruk nei tawh Brady hian American Football team Las Vegas Raiders-ah pawh share a nei a, NBA hmeichhe team Las Vegas Aces neitu zingah a tel bawk. Hei bakah hian Fox Sports tan NFL analyst a ni.

Hetihlai hian a chhuahsan tak Birmingham hi Championship-ah hmahruaitu an ni mek a, Middlesbrough leh Stoke City te nen point 29 hmuin goal difference ṭhat vangin pakhatna an ni mek a, kum 15 hnua Premier League-a kir leh turin beiseina sang tak an nei.