Mavericks tan Irving leh Flagg an vul

NBA regular season khelh mekah nimin zing khan Dallas Mavericks chuan 125-122 in Indiana Pacers an hneh a, Cooper Flagg chuan point 43 score-in assist 10 a nei a, Kyrie Irving-a'n point 35 nei bawkin Mavs chak nan an thawh hlawk hle.

American Airlines Center, Dallas-a inkhelah mikhual team zawkin bul an ṭan ṭha a, Ivica Zubac, Pascal Siakam leh Andrew Nembhard te an tal na nghal hle a, 31-26 in first quarter-ah hma an hruai. Mavericks tan Flagg a langsar nghal a, Pacers chhanglet tur ber a ni.

Second quarter-ah pawh pacers an khel ṭha a, Aaron Nesmith, Kelly Oubre Jr. leh Obi Toppin te kut a kal bakah, YJ McConnel chu a luh chhunah a khel ṭha thei hle.

Mahse Irving-a'n a thiam thil a lantir ṭan a, Flagg-a'n a thlawp ṭha bawk. Chutihrualin Mavs defence a khawng ṭha tawk lo a, Pacers forward Siakam a khelh ṭhat bawk avangin 66-56 a hnufual chungin chawlhlawk an hmang.

Third quarter-ah erawh Mavs an khel ṭha zawk a, Kyrie chu veng uluk hle mah se dan reng theih a ni lo. Pacers-in ball an hloh ngun avangin Mavs-in an hnaih zel a, Flagg chuan a hun ṭha neih a chhawr ṭangkai bakah, PJ Washington leh Santi Aldama ten mamawh hunah point an score theih bawk avangin an inthlauhna an tizim zel.

Quarter tawp berah Flagg a inlar ve ta a, Rookie of the Year ni lai hi a tawp thlengin a che ṭha tluan tawh a, quarter danga langsar lo tak Naji Marshall-a'n hma sawn bawkin, an hmahruaina an la let.

Chutihrualin Nembhard-a'n Pacers tan point a nei ve reng a, Nesmith leh Jarace Walker te kut kal a tawp bik loh avangin three points an lut thei a, Mavs-in hma an hruai fal thei bik lo.

Hun tawp lamah erawh Flagg dan theih a ni lo a, veteran point guard Irving nen an inkawp fuh avangin second 18 chauh awm tawhah 123-122 in hma an hruai a, Pacers an foul a ngaih tawh avangin Kyrie kutah ball pek zel a ni tawh a, free throw hlah duh loin 125-122 in hma an hruai.

Second li la awmah Pacers-in 'inbound' an nei a, three points an luh chuan chak thei dinhmunah an la ding. Mahse, Nembhard-a pass ṭhat tawk loh avangin Caleb Martin-a'n Siakam chu ball a lak khalh a, hun a tawp zui nghal avangin Mavs an chak.

Kum 19 mi Flagg a khel ṭha takzet a, fourth quarter-ah ringawt point 16 neiin Kyrie chuan point 10 a score ve bawk a, an pahnih point belh khawm ringawt hi point 75 a tling hial.

Inkhelh banah Flagg chuan, "A tir lamah khel ṭha tawk lo mah ila kan hnual phah lo a, kan beidawn duh loh rah kan hmu. Kyrie te ang player thiam bik leh tawnhriat ngah khelhpui hi a hlawk thlak takzet a, a hnen aṭangin thil tam tak ka zir a, kan la mamawh dawn chauh," a ti.

Mavericks hi Zirtawpni zing dar 6:30-ah Minnesota Timberwolves nen an inhmachhawn leh nghal dawn a, chak an duh a nih chuan Flagg leh Kyrie bakah player dang an chet ṭhat tel a ngai tawh dawn a, defence lamah hma an sawn a ngai bawk ang.