Sawiselna karah VAR chief Neil Swarbrick a ding nghet

Premier League-a hman ṭan video assistant referees (VAR) chu nasa takin sawisel ni mah se an hotupa ber Neil Swarbrick chuan a hlawhtling thawkhata a ngaih thu a sawi a, full mark 10-ah 7 a pek thu a sawi. 

Neil Swarbrick chuan, "Dik taka sawi chuan kan bul ṭan danah hian kei chu ka lawm hle. Mark 10 aṭanga teh tur ni ta se 7 ka pe ang. VAR awm hnuah hian thutlukna siam sual tur tam tak kan pumpelh a ni," a ti. Liverpool leh Manchester City inkhel avang khan VAR chungchang sawi a ri ring lehzual a, 3-1 a tlawm City hian penalty vawi hnih hlawh chhuak turah an inngai a ni. 

Kartawp Premier League-a Tottenham Hotspur leh Sheffield United inkhelah Sheffield hi offside vangin an goal khung pawmsak an ni lo a, mahse mi tam zawkin VAR thutlukna siamsualah an ngai. 

Season hmasa khan referee-ten thutlukna pawimawh siamna tur chi - goal, red card leh penalty-ah 82% chu thutlukna an siam dik a, tun season kal mekah 90% a tling. Chumi awmzia chu tun dinhmunah chuan VAR hian thutlukna siam dik kawngah referee-te a pui ngei tih hi a ni a, Neil Swarbrick chuan tun aia hmasawn lehzual tura an inbuatsaih reng thu a sawi. 

Premier League-a VAR hotupa chuan, "Hmasawn turin theihtawp kan chhuah a, sawiselna pawh kan ngaithla zel ang," a ti a, anmahni sawiseltute thurawn pawh ngaihthlak zel an tum. English top flight football-a match 120 khelh tawhah VAR hi vawi 800 hman a ni tawh a, VAR hmang hian thutlukna siamsual 29 chu thlak a ni tawh bawk. 

VAR hotupain 10-ah 7 inpe mah se Chelsea striker hlui Chris Sutton chuan he ngaihdan hi a ṭawmpui lo. Sutton chuan, "Engtinnge 7 a inpek theih zawk? Zak miah loin chu thil chu a sawi em ni?" a ti a, Swarbrick thusawi a ṭawmpui lo hle. 

Sutton chuan, "Game lian tak takah tihsual an ngah em em a, tihsual duhawm lo tak tak a ni. VAR thlawptu ka ni a, a nih tur angin thawk se ka ti. Mahse, engkim hi an ching pawr a ni ber mai," a ti! Manchester City defender hlui Micah Richards chuan, "Thutlukna pawimawhah tihsual an nei fo a, VAR phenah an biru a ni ber. A pawimawh ber chu VAR hman a nih chuan referee hian screen-ah va en ve ngei se, tih hi a ni," tiin a sawi. 

England goalkeeper hlui Paul Robinson chuan, "An ti buai zo vek a ni ber. A nih tur angin buaina a chingfel lo a, mi ṭhenkhat ngaihdanin a kal a ni ber zawk alawm," a ti a, VAR hman danah a lawm lo.