Unai Emery chungah rinna an la nghat!

Premier League manager zingah Arsenal boss Unai Emery chu tun hnaia chanchin ngaihven hlawh zinga mi a ni a, a chanchin an ngaihven chhan hi a chet ṭhat vang ni loin result a neih chhiat vang a ni thung.

Arsenal fans zingah an manager hi ban tura duhtu an tam tawh a, an khelmual Emirates Stadium-ah ngei pawh 'boo' khum an tawk hial. Mahse, club thuneitu lam chuan an manager chungah rinna an la nghat ngam a, ban tumna an nei rih lo!

Gunners head of football Raul Sanllehi leh managing director Vinai Venkatesham te chuan tun dinhmunah manager ban tumna an nei lo a, amaherawhchu hmasawnna an duh thu an sawi tel thung.

Premier League match an khelh hnuhnung 10-ah Arsenal hian vawi hnih chiah hnehna an chang a, an match hnuhnung berah phei chuan Leicester City mualah 2-0 in an tlawm - table lamah pawh parukna dinhmun an luah hram.

Gunners hi an insiamṭha thuai a nih loh chuan league nomawi chawi beisei ngam chi a ni lo, a sang pali zinga tel phak ringawt pawh beisei ngam a harsa tawh. Club lian 'inti' ve tan chuan an dinhmun hi a duhawm lo a, beiseina sang tak nena an lakluh Spanish manager hian hlimna a thlen thei rih lo.

Arsene Wenger hunlai khan sum an hmang hnem tawk lo tia sawi theih a ni. French manager thlaktu Emery erawhin a mamawh ang player a nei theia ngaih a ni, club record siama an lakluh Nicolas Pepe pawh tun hnaiah a chhawr mumal ngam lo chu a ni ber tawh.

Attacking game ngaina Emery hnuaiah Arsenal goal nawr a na tawk lo a, striker Pierre-Emerick Aubameyang chu EPL hmatawng 'hot' berte zinga mi ni mah se chawmtu a nei ṭha tawk lo - a kawppui Alexandre Lacazette pawh player ṭha tak ni mah se champion pui tham striker chu niin a lang rih lo.

Hmatawng an chet ṭhat theih nan midfield rem thiam a ngaih bakah ball pe thiam bik neih a pawimawh. Unai Emery-a'n 'final third' a ball pe thiam hmingthang Mesut Ozil a chhawr mumal duh lo a, defensive midfielder Lucas Torreira chu a venhim lam ai mahin goal nawr turin a tawlh hma tir fo leh lawi si.

Granit Xhaka chu captain a nihna hlihsak ngai hial khawpin a puitling lo a, rawlthar Matteo Guendouzi chu player taima leh huaisen ni mah se Paul Pogba te nen huang khata dah chi a la ni rih lo bawk.

Season hmasa khan Aaron Ramsey a chhuak dawn tih a chian tawh avangin match a khel tam lo a, Wales international tel loa khelh dan an zir kha a mak lo. Player pawimawh ni mah se a chhuah dawn miau avangin a hmunruak hnawh khat thei tur chher kha thil pawimawh a ni.

Kuminah Real Madrid aṭangin ball thiam Dani Ceballos chu loan hmangin an lalut a, an inrem danah season tawpah a nghetin an la dawn tih a chiang lo. Spain international hian Real Madrid chu amah hralh lo turin a ngen hial zawk.

Season tawp ruala haw leh mai thei Ceballos chhawr ai chuan hun rei zawk cham tur leh tawnhriat ngah zawk Ozil hman rim hi mi tam tak ngaihdan leh duh dan a ni a, mahse inkhel tur thlangtu manager ngaihdan erawh a ni lem lo - midfield buaina hi siamṭhat an mamawh langsar a ni.

Rob Holding leh Hector Bellerin te bakah beiseina sang tak nena an lakluh Kieran Tierney ten hliam vangin season bul an ṭan thei lo a, tlarhnung lam a pawp hi chu thil mak tak a ni hran lo.

Laurent Koscielny leh Nacho Monreal te an chhuah laiin David Luiz an nei thar thung. Season hmasa khan Luiz hi Chelsea rinrawl a ni a, a chhuah chhan zingah manager thar Frank Lampard-a'n a chhawr rim ngei dawn tih a tiam theih loh vang a ni.

Brazilian defender hi tun season kal mekah chuan Gunners tlarhnung luahlumtu a ni a, penalty chawi leh ho lam taka tihsual neih a chin avangin a rintlak tawk loh tih chu chiang takin a hmuh theih. Midfield ang bawkin tun thleng chuan Emery-a'n a tlarhnungah khel tur nghet a la thlang fel lo a, player hliam am dam tawh hnuah pawh khelh dan phung nghet nei loa a chuk lawr lutuk hi goal an chhuah tam chhan langsar takah a ngaih theih.