Saudi Arabia-ah an khel dawn!

Spanish football-a thuneitu sang ber Royal Spanish Football Federation (RFEF) chuan Spanish Super Cup chu Saudi Arabia-ah neih a nih tur thu an puang a, sawiselna an tawk nghal nasa hle. 

Season ṭan nana khelh ṭhin inelna hi RFEF chuan a kalphung a thlak danglam a, tun season atan inelna hi khelh a la ni lo - nakkum January-ah Saudi Arabia-ah hian neih a ni dawn a ni. Team pali telna tura thlak danglam tak inelna hi King Abdullah Sports City stadium chuan a thleng dawn a, he stadium-ah hian mipui 62,000 an leng. 

Spanish Super Cup khelh hnuhnun ber chu August 2018 kha a ni a, Barcelona chuan 2-1 a Sevilla hnehin champion lai an ni. 

Spanish Super Cup-ah kalphung thlak danglam a ni a, Copa del Rey-a finalist leh La Liga-a pakhatna leh pahnihna ten inelna hi an hmachhawn tawh dawn. Season ṭantira khelh ṭhin inelna hi a hma zawng chuan La Liga leh Copa del Rey champion-in an khel ṭhin kha a ni a, kalphung thlak danglam hlawk hian eng ang takin nge team-a nghawng ang, tih chu hriat châkawm zingah a tel ta. 

Tun season-ah hian Barcelona, Real Madrid, Atletico Madrid leh Valencia te chuan inelna an hmachhawn dawn. Barca hi La Liga pakhatna leh Spanish Cup finalist khelh vanga inlan tur an ni. Valencia hi Spanish Cup champion nih vanga inlan tur an ni thung a, La Liga pahnihna nih vangin Atletico an inlan dawn - Barca chet ṭhat zarah league-a pathumna Real hian hmun an chang ve leh bawk. 

Infiamna khawvelin Saudi lamah sum a tam tih an hre laklawh a, Spanish Super Cup hi tun hnaia middle-east rama inelna chhawptu an ni lo. 

Italian Super Cup 2018 chu January khan Saudi hian a lo thleng tawh a, December-ah Juventus leh Lazio chuan King Saud University Stadium, Riyadh, Saudi Arabia-ah Super Cup hi an khel leh dawn bawk. Boxing khawvel ngaihven hlawh Andy Ruiz vs Anthony Joshua rematch chu December khian Saudi Arabia-ah tho neih a ni dawn bawk a, Tyson Fury inlanna WWE Crown Jewel chu October 31 khan neih a ni bawk. 

Spanish chanchinbu lar ABC-in a tarlan dan chuan Spanish football thuneitute hian kum thum chhung atana inremna an ziah aṭangin kum khatah pound maktaduai 29-34 inkar hlawkna an tel thei ang. 

Saudi-in Spanish Super Cup a thleng tur hian sawisel a tawk nghal nasa viau a, hmeichhe zalenna rahbeh nasatna hmun a nih avangin infiamna khawvelin Saudi lam a hawi leh ṭhin hi an hua a ni ber. Spain acting junior minister for sport Maria Jose Rienda chuan, "Hmeichhe zalenna zahsak an nih lohna hmuna he inelna an nghat hi a demawm hle," tiin RFEF thutlukna chu na takin a sawisel.

Hmeichhe footballer, Spain tan vawi 56 inlana goal 38 khung thei Veronica Boquete chuan, "Sumin engkim a si thlu a ni," tiin a lo sawisel tawh a, hetihlai hian RFEF president Luis Rubiales chuan, "Kum 2030 World Cup thlen kan dilna kawnga min pui thei thil a ni," tiin a sawi thung. 

Saudi hian Crown Prince Mohammad bin Salman hnuaiah nasa takin hma an la ve reng a, hmeichhe motor khalh phal loh,hmeichhe inchei dan leh intluktlanna lama an dan khirh tak tak chu a hlip ṭhen tawh a, kum 2017 khan hmeichhia tan stadium-a inkhel en phal lohna dan an neih chu an hlip tawh bawk.