Man United dinhmun hi eng ang chiaha chhia nge?

Manchester United hotute nizan khan Monaco-ah an inhmu khawm a, he thu i chhiar meuh chuan Michael Carrick hmalam hun a chiang tawh ang. Monaco hi club neitu zinga mi Sir Jim Ratcliffe a chenna a nih bakah a company Ineos hmunpui a ni a, hei vang hian Old Trafford aṭanga km 1300 vela hlaah thutlukna an siam phah.

Chief executive Omar Berrada leh director of football Jason Wilcox te pawh thutlukna siam turin an zin a, Carrick-a hi ban ngei tura ngaih a ni. Nikum January khan Ruben Amorim chu Leeds United nen 1-1 an inhnehtawk zawhah media hmaah pawr takin a ṭawng a, darkar 19 hnuah an ban.

Erik Ten Hag-a kaihhruai Man United khan match hmasa pakuaah vawi thum chauh hnehna an chang a, West Ham United laka an chak loh aṭanga ni khat hnuah an ban. Dutch manager hi kum 2024 nipuiah ban tum a ni a, mah se FA Cup final-a Manchester City an hneh avangin ban a ni lo a, thla li hnuah an ban leh ta tho.

Nimin lamah chuan khawthlang lam media-ten Manchester United hi Mauricio Pochettino nen inremna an nei hnai niin an sawi a, Carrick an ban fel hnuah Argentine manager hi la fel nghal tura ngaih a ni. Chutihrualin English manager Carrick hi club hotu lamin media hnena thu pawimawh an tiput ru nasa tak chu a lawm lo niin an sawi bawk.

Manchester United dinhmun thlir erawh chuan Carrick hi ban pawh ni se, vui thei a ni lo. Premier League-a match 10 an khelh zawhah an result chhiat ber ṭum lawrlak a ni. Chutihrualin player lei nan erawh Carrick hian sum a hmang tam hran lo. English manager hian player lei nan £148mtd a hmang a, a hmaa manager Erik Ten Hag (£600mtd), Ole Gunnar Solskjaer (£387mtd), Jose Mourinho (£364mtd) leh Ruben Amorim (£262mtd) te aiin a hmang tlem vek.