Lalber chu khumtir rawh u - Nmecha

German footballer Felix Nmecha chuan a goal khung a lawm ṭhin dan avangin beih a tawk mek a, a club khelh mekna Borussia Dortmund fan-te ngei pawhin Nmecha hi an sawisel tawh!

Nmecha hian goal a khung apiangin, lallukhum la thla a, Pathian khumtir angin a lawm ṭhin a, hei hi kristian footballer intelkhawm pawl 'Ballers in God' te au hla 'The King's Return' nen a inzul niin sawiseltute chuan an sawisel.

Hei tak hi Dortmund ṭantuten an sawisel chu a ni a, Ballers in God-te hian neih inang inkawp leh, mahni nihna thlak (transgender) te na takin an do a, nau tihtlak pawh 'Setana ruahmanna' tiin an sawi ṭhin, an ti - hei hi an huat chu a ni!

Dortmund ṭantute chuan, "Ballers in God te kalphung leh, mi zawng zawng lenna hmun ni tura Dortmund kal dan chu a inmil lo a ni," an ti a, an midfielder Nmecha goal khung lawm dan chu an sawisel.

Isua chu Lal a ni

Nmecha-a'n sawiselna tawk mah se, a goal khung a lawm danah insum erawh a tum chuang lo - Isua Krista chu lal a nih avangin, amah chawimawi nana chutianga a goal khung chu lawm ve ṭhin mai a nih thu a sawi.

Nmecha chuan, "Keimah emaw, pawl dang emaw tihlar tuma hetianga ka goal khung lawm ṭhin ka ni lo. Khawvela ropui taka lo kal leh tur Isua Krista tan ka lallukhum chu ka lo kian e, ka tihna mai a ni a, ani chu ka beiseina leh chakna a ni," a ti.

Kum 26 mi Nmecha chuan sawi zawmin, "Ka goal khung lawm dan hian Isua lam chauh a hawi a, midang huatna leh inthliarna lam engmah a kawk lo.

"Kristian kan nih angin kan thu ken chu, eng ang mi pawh niiin, a thlir dan chu eng pawh ni se, mi zawng zawng hmangaih leh ang khat veka en hi a ni," a ti a, a goal khung lawm dan sawisel mah se, insum a tum hmel loh hle.

Football-ah Kristianna

Ballers in God pawl hi professional footballer zinga Kristian ṭhenkhat intelkhawm pawl an ni a, Crystal Palace leh Tottenham Hotspur midfielder hlui John Bostock-a'n a din a ni.

He pawl hian Kristian rinna chungchang nasa taka puangzarin, an pawl nena inzawm langsar zingah England centre back Marc Guehi, Arsenal chhuanvawr Bukayo Saka leh Brazil legend Kaka te pawh an tel.

Tun hnaiah footballer tam takin khelmual chhungah an rinna an tilang nasa a, inkhelh zawh interview thlengin Pathian hming an lam ri fo - Nmecha goal khung lawm dan pawh hi ama lawm dan bik ni loin, player tam takin an zawm ve tho.

Mizo footballer zingah ngei pawh Edmund Lalrindika chuan Nmecha goal khung lawm dan hian East Bengal tana goal a khungin a lo lawm tawh a, Lallianzuala Chhangte chuan a goal khung lawm nan ṭhingṭhiin van lam a kawk ṭhin bawk.

Nmecha bik?

Dortmund midfielder Nmecha chauh hi hetianga a goal khung lawm a ni lo - Premier League-ah ngei pawh Nottingham Forest-in 3-1 a Manchester City an hneh ṭum khan Jair Cunha chuan hetiang chiah hian a goal khung a lawm.

Football khawvelah intluktlanna thupuia hmangin, neih inang inkawpte leh mahni nihna thlakte thlawpna lam hawi an kalpui nasa a, season hmasa khan Premier League team captain-te chu LGBTQ thlawpna captain armband, chhimbal rawng hreng tura tih an ni hial a nih kha.

Mahse, khatihlaia Palace captain Guehi chuan, "Isua ka hmangaih' tih inziahna a hreng lui ngat a ni! Ipswich captain Sam Morsy pawh Kristian ni lo mah se, "Ka rinna nen a inkalh," tiin a hreng duh lo ngat a, Muslim a ni.

Manchester United chuan season hmasa khan LGBTQ+ thlawpna jacket hak an tum a, mahse, player-ten an hak duh loh avangin an ruahmanna hi an titawp zui - a la ngaihnawm dawn chauh.