Italy leh France intawng leh dawn ta

UEFA Nations League-ah football khawvela ram lian pahnih, Italy leh France te chu zanin dar 1:15-ah an inhmachhawn dawn a, an inkhel result hian group A hmahruaitu tur a hril theih dawn avangin inkhel hmuhnawm a beisei ngam.

Italy thar

Azzurri tan tawnhriat nei ṭha Giovanni Di Lorenzo chu Juventus laka a inhliam avangin a inhnukdawk a, Napoli defender bakah hian hliam vangin Roma centre back Gianluca Mancini a inlan dawn lo bawk.

Chutihrualin Premier League defender pathum Riccardo Calafiori, Michael Kayode leh Matteo Ruggeri bakah Alessandro Bastoni an la neih avangin tlarhnung a ngaihtuahawm lutuk loh.

Midfielder an dam ṭha a, Inter Milan duo Nicolo Barella leh Davide Frattesi te chu an innghahna an ni leh dawn a, Sandro Tonali-a'n a thlawp thei dawn bawk.

Tlarhma lamah Giacomo Raspadori leh Moise Kean te an inlan thei dawn lo a, mahse tun hnaia che ṭha tak Pio Esposito tan hun ṭha a inhawng thei ang. Inter forward hi a unaupa Sebastiano Esposito leh Gianluca Scamacca ten an thlawp thei bawk ang.

Hei bakah hian Paolo Maldini fapa Daniel Maldini a la awm a, a vawi khatna atana an koh Alphadjo Cisse hi AC Milan rinrawl a nih phak avangin ngaihthah a thiang dawn lo.

Zizou era

Kumin World Cup zawha Didier Deschamps-a'n a chhuahsan hnuah, France-in an ram legend Zinedine Zidane an ruai a, Real Madrid coach hlui tan Nations League hi inelnaa France a kaihhruai hmasak ber a ni a, chak loh a la nei lo.

Les Bleus tan Kylian Mbappe chu khawih chet thiang lo tluk a ni a, Ousmane Dembele, Marcus Thuram, Michael Olise leh Desire Doue te an neih bawk avangin tlarhma nei ṭha ber zinga mi an ni.

Tlarhmate thlawp turin Rayan Cherki a awm bawk a, mahse City midfielder position-ah Olise a awm theih avangin bul a ṭan kher a rinawm loh. Real midfielder Aurelien Tchouameni leh tawnhriat ngah Adrien Rabiot bakah World Cup hmang ṭha tak Manu Kone a la awm cheu.

Tun hnaia France chhiatna lai bera an sawi ṭhin chu an tlarhnung a ni a, mahse an chhiatna bera sawiah pawh hian Ibrahima Konate, Maxence Lacroix, Jules Kounde leh Dayot Upamecano te an awm avangin an ṭha thawkhat hle.

Engtin?

A zawna a vawi thumna atan kumin World Cup-ah Italy an tling zo lo a, indinthar leh tumin Euro 2020 champion puitu Roberto Mancini an ko kir a, Manchester City coach hlui tan Nations League-a champion hi bul ṭanna ṭha tak a ni thei dawn a, France an hneh chuan inrintawkna an ngah sawt ang.

October thla khan ram pahnihte hi an lo inhmachhawn tawh a, 1-1 a an inhnehtawk avangin point an insem. An intawn hmasak zawk hian Mbappe a inlan lo a, Upamecano-a'n red card a hmuh bawk. Zaninah erawh Zidane-a hote hi an chak lo a nih chuan chhuanlam an nei thei tawh lo ang.