Lamine Yamal a inlan ve dawn lo

World Champion Spain chuan zanin dar 1:15 hian Czech Republic an hmachhawn dawn a, khup hliam vangin an rawlthar duhawm Lamine Yamal a khel ve thei dawn lo.

Pathianni zana Barcelona-in 2-1 a Atletico Madrid an hneh ṭumin Yamal hi a inhliam a, Atletico lakah minute 90 khel tluan mah se a hliam hi endik a nih hnuah a chawlh rih a ngai dawn tih nemngheh a ni.

Spanish football thuneitu sang Royal Spanish Football Federation (RFEF) chuan, "Yamal hian hliam a neih avangin Czech Republic lakah a inlan thei dawn lo a, November 15, Pathianni zana England an hmachhawn hunah erawh a lo kir theih a beiseiawm," tiin thuchhuah an siam.

Kum 19 mi hian tun season-ah club leh ram tan a la inlan kim vek a, inelna hrang hrangah goal 17 khungin assist 13 a nei leh der tawh. Barca coach Hansi Flick chuan La Roja coach Luis de la Fuente chu 'Yamal enkawl uluk lo' tiin a lo chhuahchhal tawh a, Barca leh Spain tan Yamal pawimawh zia a lang.

Spanish forward hian kum 2023 khan kum 15 mi chauh niin Catalan club tan a inlan ṭan a, tun thlengin Barca tan match 167 a khel tawh a, Spain tan match 37 a inlan tling der tawh bawk.

Yamal bakah hian Mikel Oyarzabal a khel thei dawn lo bawk a, Real Sociedad forward hi Yamal ang bawkin Three Lions nen an inkhelh hunah chhawr theiha a awm hman beisei a ni.