England squad-ah James Hill

Bournemouth defender James Hill chu a vawi khatna atan England-in an ko a, Thomas Tuchel chuan Cherries centre back Hill hi Ezri Konsa aiawhtu atan a hmang dawn.

England tana bul ṭan tura ngaih Konsa chuan Champions League-a Slavia Prague an hneh ṭumin a khup a tihnat avangin thlak a ngai a, mahse Inrinni zana Hull City nen an inkhel ṭumin minute 90 a inkhel leh thei thung.

Arsenal defender Konsa hi Three Lions squad-ah awm mah se hahdamna hun pek a nih a rinawm zawk a, a inlan lo a nih chuan Hill-a tan hun ṭha a inhawng dawn.

Kum 24 mi Hill hi England under 20 leh 21 tan lo inlan tawh mah se senior team tan koh a la ni ngai lo a, tun season-a Cherries a chet ṭhatpui avangin Tuchel-a mit a la.

Hill hian kum 2018 khan Fleetwood Town-ah a career ṭanin kum li a khelhsak hnuah kum 2022 khan Cherries hi a zawm a, a kum a la naupang avangin rinrawl a ni pha nghal bik lo.

Loan-in Heart of Midlothian leh Blackburn Rovers-ah te a chhuak phawt a, tunah chuan Bournemouth ban rinawm a ni tawh. Tun season Premier League match 10 khelh tawhah a la inlan kim vek.

Zanin dar 1:15 hian England chuan Croatia an hmachhawn dawn a, Tuchel-a'n Hill hi khelhna hun a pe a nih chuan ram tana a vawi khat inlanna tur a ni ang.