Kompany a dam leh tawh

German champion Bayern Munich head coach Vincent Kompany chuan club training a kaihruai leh thei tawh a, nikhaw hre loa a tluk avanga enkawl a nih hnua team bula a kir lehna hmasa ber a ni.

Bayern chuan thuchhuah siamin, "Head coach Kompany-a'n dam lam a pan chho zel a, kar tir lam aṭang khan training ground-ah a lo kir leh thei tawh," an ti.

October 23, Zirtawpni khan Kompany hi Bayern second team training a tlawhnaah a tlu a, enkawl zui nghal niin October leh November thlaa Bavarians match nga khelhah a kaihruai thei lo.

Belgian coach awm loh chhungin assistant coach Aaron Danks chuan a ai a awh a, a chet chhiatpui lo. Match ngaah vawi li chakpuiin vawi khat an khingpuite nen an inhnehtawk a, chak loh an nei lo.

Kum 40 mi Kompany hian training zawm leh tawh mah se, player tam zawk chu ram tan an fehchhuah avangin an awm lo a, training pangngai angin a la kalpui thei lo thung.

Bayern hian November 21, Zirtawpni zanah Cologne an mikhual dawn a, kar hnih a la awm avangin an inkhelh hunah Kompany-a'n a team a ho leh theih tawh a rinawm.