F1 kharna tur sawn dawn lo

Formula 1 season kal mek kharna tura ruahman Qatar leh Abu Dhabi chu sawn a ni dawn lo a, Imola-a racetrack chu a thlakna atan buatsaih a ngai lo tih F1 aiawhte chuan an hrilh.

Kumin atan intlansiak pathum chauh an hmabak tawh a, November 22, Pathianni zanah Las Vegas Grand Prix tlan a ni dawn. Las Vegas GP neih hnu kar khatah Qatar GP tlan leh nghal tur a ni a, December 6-ah a tawp kharna atan Abu Dhabi GP neih a ni dawn.

Mahse indo buaina avangin Qatar leh Abu Dhabi-ah an tlan thei ang em tih zawhna a tam a, ṭhulh leh a ngai a nih palh takin Italy-a racetrack 'Autodromo Enzo e Dino Ferrari' (Imola) chu lo inring turin hrilh lawk an ni.

Hetiang boruak karah hian Middle East-ah intlansiak hi neih tlang a ni dawn tih nemngheh a ni a, Imola-a intlansiak a awm dawn loh avangin inbuatsaih a ngaih loh tur thu hrilh leh hnuhnawh a ni.

F1 aiawh pakhat chuan, "Middle East-a inelna tur chu ruahmanna angin kal tlangpui a ni ang. Mahse a dawn hnaihah rokhawlhna avanga ṭhulh leh a ngai a nih chuan, mi zawng zawng himna chu ngaih pawimawh ber a ni ang," a ti.

Tun season-ah indo boruak avangin Middle East-ah inelna neih theih a ni lo a, April thlaa neih tura ruahman Saudi Arabian GP leh Bahrain GP te chu ṭhulh a lo ni tawh.

Bahrain GP hi thla hmasa khan Malaysian GP neih ṭhinna Sepang Circuit-ah neih a ni a, Bahrain lamin a senso an tum vek. Saudi Arabian GP erawh sawn a ni ve lo thung. Hetiang boruak avang hian F1 tawp kharna tur hi sawn leh a ngaih ringtu an tam hle.

Mahse kar hmasa lawk khan Qatar-ah MotoGP tlan a ni a, MotoGP hi Liberty Media Corporation hnuaia awm niin F1 neitu zinga mi tho an nih avangin buaina a awm a rinawm loh thung.

Intlansiak pathum la awm dawn mah se Andrea Kimi Antonelli chu a champion tawh a, driver dangin a dawta awm an inchuh dawn. Constructors'-ah Mercedes chu champion an nih tawh bawk avangin Silver Arrows-in (Mercedes sawina) thlamuang takin inelna an hmachhawn thei tawh ang.