George-a'n a club hlui Sixers a vel

NBA regular season khelh mekah nimin zing khan Boston Celtics chuan 123-101 in Philadelphia 76ers an hneh a, Paul George chuan hlui Sixers lakah hian point 36 zet score-in an chhuahtir chu an tisual tih a lantir.

Xfinity Mobile Arena, Philadelphia-a inkhelah team pahnihte an inhlau lo tawn a, hma an inhruai chhawk nghal zak zak. Celtics tan Derrick White leh Tatum te an hmuhnawm nghal a, point an hlawh chhuak nghal mawlh mawlh.

Mahse Sixers tan Tyrese Maxey a khel ṭha a, Jaylen Brown-a'n a club hlui laka a dunk laia thawm chu ring tak a ni. Mahse first quarter tawp lamah an inthlahdah avangin point an hloh hnem a, Maxey an thlawptu a neih ṭhat tawk loh avangin 30-23 in an hnufual.

Second quarter-ah White thlaktu Payton Pritchard-a'n point a rawn hlawh chhuak nghal a, Sixers tan a hnawk hle. Second quarter tawp dawnah George a inlar ṭan a, three points hmangin a team hmahruaina a tizau.

Point 16 zetin Celtics-in hma an hrai fal hman a, Sixers tan Brown, VJ Edgecombe leh LeBron James ten point nei ve mah se Celtics an phur laklawh a, 62-51 in chawlhlawk an hmang.

Third quarter-ah Sixers-in hma an sawn a, LeBron, Maxey leh Edgecombe te chu Celtics hnaihna point hlawh chhuaktute an ni. Mahse Celtics kut kal lai a tawp bik lo a, Tatum a che ṭha hle. American forward hian LeBron a dunk khum laiin a rookie season a hrechhuak ang.

George-a'n a khat tawkin point a nei ve reng bawk a, mahse Sixers tan Maxey leh Dean Wade ten three point hmangin an chhanglet ve thei zel a, 91-82 a an inthlauhna pawt zimin inlehthlan thlentir turin beiseina an insiam.

Mahse fourth quarter-ah Celtics an chungnung zawk a, George leh Pritchard te kut a kal laklawh tawh a, George chu Maxey leh Joel Embiid ten veng mah se dan theih a ni tawh lo.

LeBron leh a hote'n theihtawp chhuahin bei let mah se beisei an pha lo a, minute nga khelh tur la awmah chak tur a chiang titih der tawh. Hun tawp thlenga Celtics an chungnun zawk avangin, tun season-a a vawi hnihna atan Sixers an tlawm.

Inkhelh banah George chuan, "He club ka zawm hian a langsar ber nih ka tum lo a, Tatum thlawptu ṭha tak nih chu a tir aṭanga ka thil tum a ni. Tun game-ah bik kha chuan kan khel ṭha vek a, nuam ti taka kan khelh theih avangin a lawmawm ka ti hle," a ti.

Kum 36 mi George hian Sixers tan 2024 aṭang khan a khel ṭan a, mahse kumin nipui lai khan Celtics forward Jaylen Brown an duh zawk avangin player pahnihte hi an inthleng. An intawnna hmasa berah tawnhriat ngah zawk George a dingchang a, a team hlui lakah phuba a la.