Lajong khingpui tur Sreenidi

Indian Football League-ah zanin dar 6:30 hian Shillong Lajong-in Sreenidi Deccan an mikhual dawn. Lajong hi an match hnuhnung berah Chanmari FC nen an inhnehtawk a, Sreenidi Deccan pawh Real Kashmir nen 1-1 thoin an inhnehtawk.

Lajong hian Mizo pahnih midfielder Emmanuel Lalchhanchhuaha leh left back Ephraim Lalremtluanga te an kawl a, Pehlawn tlangval Ema leh New Champhai tlangval Ephraim te hian hmun pawimawh an chang pha.

Sreenidi lamah Mizo pasarih Brandon VL Remdika, Jerry Mawihmingthanga, Lalbiakdika, Lalromawia, Lalthankhuma, Rochharzela leh Rosangzuala te an awm. Real Kashmir nen an inhmachhawn ṭumin Samlukhai tlangval Romawia chiahin bul a ṭan a, bench aṭangin Cherhlun tlangval TK-a, Chanmari forward Jerry leh Hunthar tlangval Brandon te an lut thung.

Zanin inkhel hi DD Sports leh Waves app hmangin a thlawnin a en theih. IFL-ah hian team 11 an awm a, round tinin team khat zel an awl. Tun ṭumah hian Mohammedan SC an awl dawn a, round 2-a awl Mizo tamna Nagaland United pawh an inlan dawn. Mizo 20 awmna Nagaland United hian Inrinni zanah Gokulam Kerala FC an hmachhawn dawn a, Mizo club awmchhun Chanmari FC-in Pathianni tlaiah Dempo SC an tlawh thung ang.