Germany leh Adidas tan hun hnuhnung

German Football Association (DFB)-in kum 1954 aṭang khan Adidas kut chhuak an ha char char a, kum 70 chuang an hak hnuah kumin hian an inṭhen dawn. Tun ṭum international break hi Germany national team-in Adidas kut chhuak an hak hnuhnung ber tur a ni tawh a, nakkum aṭang chuan Nike kut chhuak an ha tawh ang.

Adidas kawr ha hian Germany-in World Cup nomawi vawi li 1954, 1974, 1990 leh 2014 an chawi a, European Championships-ah vawi thum (1972, 1980, 1996) an champion bawk. Jurgen Klopp-a hote hian Nations League playoff an thlen phak a, nomawi an chawi a nih pawhin Nike kut chhuak an ha tawh ang. Nations League Playoff hi nakkum March thlaa khelh tur a ni.

Germany hian Klopp-a hnuaiah bul an ṭan ṭha tawk lo a, group khat aṭangin team hnihin quarterfinal an lut dawn mah se an dinhmun a ṭha lo. Klopp-a hote hian zanin dar 1:15 hian Serbia an tlawh dawn a, playoff khelh beiseina nei turin an chak ngei a ṭul dawn. Inkhel dangah point riat hmu tawh pahnih Netherlands leh Greece te an inkhel bawk ang.

Klopp-a'n tun ṭumah hian hliam vangin Jamal Musiala leh Serge Gnabry te a ko tel lo a, hliam vangin Waldemar Anton a inhnukdawk leh bawk. Chutihrualin Liverpool manager hlui Klopp hian David Raum, Nick Woltemade leh Karim Adeyemi te a ko tel lo.

Match hnuhnung bera Greece nena an inhnehtawk ṭumin Germany hian 70% ball an chang a, shot vawi 21 neiin goal zawnah vawi li petin goal an khung lo a, hei tak hi Serbia laka insiamṭhat ṭulna tur a ni.

Mahni muala khel tur Serbia hian goal venhim hna an thawh ngei a rinawm a, Klopp-a kaihhruai Germany-in an paltlang dan a ngaihtuah a ṭul ang.