Zanin dar 7:30-ah MBOCWWB MFA Inter Village Futsal final : Sihphir Venghlun vs Zemabawk North

Mizoram Football Association buatsaih MBOCWWB MFA Inter Village Futsal final chu zanin dar 7:30 hian Sihphir Venghlun leh Zemabawk North ten R. Dengṭhuama Indoor Stadium-ah an khel dawn. Sihphir Venghlun buk a rit zawk a, mah se Zemabawk North boruak a ṭha a, an hlau bik lo ang.

Futsal final hi BR Studio YouTube channel-ah Rs 59 chauhin a en theih a, member nih hian quarterfinal leh semifinal-a inkhelte thlengin a en let theih bawk. Chutihrualin Sihphir Venghlun leh Zemabawk North mipuite erawhin a hmun ngeia en an duh ang.

Futsal thiam veng

Kum 2025 khan Central YMA Futsal hmasa ber neih a ni a, Dinthar an champion. Team 114 zet telnaah Dinthar hian final-ah Zonuam chu 5-2 in an hneh. CYMA Futsal bik hi chu vawi khat chauh la neih a ni a, Inter Village futsal erawh neih a ni fo tawh. Kum 2020 khan Dintharin final-ah Zonuam 6-3 a hnehin an champion. Dinthar leh Zonuam te hi futsal thiam veng ni mah se tun ṭumah erawh an che ṭha tawk lo.

Kum 2023 khan tun ṭuma final khel tur Sihphir Venghlun hian nomawi an lo chawi tawh a, final-ah Electric Veng 4-3 in an hneh. Kum 2024-ah Zonuamin final-ah Durtlang 3-1 in an hneh leh bawk. Dinthar hian CYMA Futsal bakah Inter Village Futsal nomawi an chawi tawh a, Inter Village Futsal-ah Zonuam leh Sihphir Venghlun te an champion tawh thung.

Tun ṭumah Zemabawk North an rawn lang hlawl a, result ṭha an neih theih nan MPL thlenga tawnhriat nei ṭha Peter Lalrinhlua chu an khaipa ber a ni a, Lalnunsanga a pawimawh bawk. Zemabawk North-in kum naupang rual an thawhchhuahpui avangin mipui puihna an mamawh lehzual ang.

Final chu

Sihphir Venghlunin semifinal-ah anmahni ang bawka team ṭha Aizawl Venglai an lehthal a, 2-1 in an hneh. Final khel tur zawnnaah hian captain PC Lalruatsanga a che ṭha a, Lalmuansanga a pawimawh viau bawk.

Zemabawk North khingpui erawh an nem hret a, Reiek lakah 10-4 in an chak. Chutihrualin scoreline ang chauha en a rem lo a, a tir lamah an inhnehtawk hle. Zemabawk North-in 3-1 a hma an hruai hnuah 3-3 a ni a, 4-4 te ni chho hman hial.

Mahse, first half a tawpin Zemabawkin 6-4 in hma an hruai a, second half-ah goal li khung belh lehin 10-4 in an chak. Final boruak sangah Zemabawk North naupang rualte fiahin an awm dawn a, an hun ṭha neih bawhpelh an tum lo ang.