Palace-in coach an ban

Premier League mawngphaha awm mek Crystal Palace chuan an manager Pierre Sage an ban a, Oliver Glasner thlaktu Sage hi London club-ah hian thla nga chiah a awm hman!

Palace hian international break hmaa an match hnuhnung berah Liverpool chu 3-1 in an ngam lo a, Premier League match li a zawna an chak lohna chiah a ni.

Tun season-a league match 10 an khelh aṭangin vawi hnih chiah hnehna an la chang a, goal 24 ngawt chhuahin, tun season-a EPL khelh tawh chinah anni aia goal chhuah hnem an awm lo!

Europa League lamah pawh Eagles hi team 36 inel zingah 21-na an ni mek a, match li an khelh tawhah vawi khat chiah chakin, vawi hnih draw an nei a, vawi khat an tlawm - season hmasaa Europa Conference League champion hian Sage-a hnen aṭangin an beisei an hmu lo a ni ber.

Palace chuan thuchhuah siamin, "Club hian Pierre leh a staff-te, he hmun an awm chhunga an hnathawh avangin lawmthu a hrilh a, an hma hun atan duhsakna a hlan a ni. Manager thar chungchang chu kan puang thuai ang," an ti bawk.

English club hian Sage-a coaching staff Jamal Alioui, Damien Della Santa leh Sandy Guichard te pawh an chhuah thu sawiin, Brentford leh Tottenham Hotspur coach hlui Thomas Frank chuan Sage hi a thlak a rinawm.