USA-in Poch thlak turin Pep beisei

U.S. Soccer chuan an coach Mauricio Pochettino chuan an team chhuahsan a, Manchester United a zawm dawn avangin a thlaktu turin Pep Guardiola an beisei a, thil awlsam erawh a ni lo ang.

Manchester United thuneitute chu Nilaini khan Monaco-ah inhmu khawmin, Michael Carrick an ban thu nimin khan an puang a, Poch-a'n a thlak dawn. Mahse, Poch hi contract nei lai a nih avangin Red Devils hian dollar maktaduai 10 an sen a ngai dawn thung.

Hetiang karah hian US Soccer thuneitute chuan Poch thlak tur an dap ru ve mek a, Pep hming a ri ring hle nia sawi a ni - US hian Poch an rawih hma khan Pep hi Jurgen Klopp nen an lo ngaihven tawh a, mahse, coach pahnih an thlem luh theih loh avangin Poch an la lut zui.

Pep hian season hmasa zawh rual khan Manchester City chhuahsanin, chawlh hahdam a mamawh thu a sawi. Hei vang hian US tan Pep thlemchhuah a har ang tih a chiang a, Italy pawhin sum tam tak nen thlem mah se a lo hnar tawh.

Italian football federation president Giovanni Malago chuan, "Pep hian tlang takin a sawi a. A chhungte vanga chawlh a la mamawh thu a sawi," a ti a, Spanish coach chuan a chhungte kianga hun hman a thlahlel rih.

Hetihrual hian United-in Poch lo la lut ta pawh ni se, Argentine coach hian tun international break-ah chuan US hi a la kaihruai dawn tho nia sawi a ni a, chuti a nih chuan Pep-a tan March velah bak US kaihhruai a ngai dawn lo - thla engemaw zat a la chawl thei dawn tihna a ni a, national team enkawl hi club enkawl ang emin a hautak lo bawk.

Pep hian Barcelona chhuahsana chawlh a lak khan, New York khawpuiah chengin US hi nuam a ti hle nia sawi a ni a, kum 2024 khan national team an nihna anga US hmachhawp chu thil phurawm tak a nih thu a lo sawi tawh bawk.

Kum 55 mi coach hi U.S. Soccer president hlui Sunil Gulati nen ṭhian ṭha tak an ni bawk a, Gulati hian Pep hi engtikah emaw chuan US team a enkawl a ngaih tur thu a lo hrilh tawh.

Mahse, Pep hi team langsar chauh enkawl duh nia sawi a ni ṭhin a, a chawlh hman hi duhtawk tawh pawh ni se, khawvela football ram ṭha pawl ni lem lo US enkawl hi a duh ang em, tih chu zawhna chhan harsa tak a ni.