Bangladesh-in Sri Lanka sawp

SAFF Championship-ah semifinal khel tur a hriat kim ta a, Nilaini zan khan a thlengtu Bangladesh chuan 4-0 ngawta Sri Lanka sawpin an puanthuah an teltir - Sri Lanka an tlawm avangin Bhutan-in semifinal an lut zui a, India nen an inhmachhawn ang.

Bangladesh hian tun hnaiah an national team hmasawnna turin hma an la nasa a, Bangladesh thisen kai, ram pawn lama khel, an pianna ram tana khel pha si lote chu an ram tana inlan turin an sawm a, chung zingah chuan Leicester City midfielder hlui Hamza Choudhury pawh a tel.

Sheffield United tana khel mek Hamza hi Sri Lanka laka goal khung zingah pawh a tel a, ani bakah hian USA League One club New York Cosmos tana khel mek Shamit Shome, Fulham rawlthar, non-league club Boreham Wood-a loan-a khel mek Farhaan Ali Wahid leh Bangladesh club Bashundara Kings winger Rakib Hossain ten goal khat ṭheuh an khung a, Sri Lanka-in a chhanletna tur an nei lo.

SAFF Championship-ah hian a thlengtu Bangladesh bakah India, Sri Lanka, Pakistan, Bhutan leh Maldives an tel, group pahnihah team pathum ve ve awma ṭhen niin, a sang pahnihin semifinal an lut.

Group A aṭang hian Bangladesh leh Bhutan tlangin, Sri Lanka an tla a, group B aṭangin India leh Pakistan tlangin, Maldives an tla thung.

Semifinal hi November 14, Inrinniah khelh tur niin, India leh Bhutan an inkhel ang a, Bangladesh leh Pakistan ten final luh an inchuh bawk ang.