World Cup hmaa buaina nei tawh McTominay

Scottish midfielder Scott McTominay chuan kumin World Cup khelh hma khan a lung lamah buaina a lo nei tawh a, tun hnaia harsatna tawk thar a nih loh thu a sawi.

Kum 29 McTominay chuan, "World Cup-a kan match hmasa bera Haiti nen kan inhmachhawn hma ni hnihah khan enkawl ka ngai a, engmah insawiselna ka neih loh laia ka chunga thil thleng kha ka hrethiam lo takzet," a ti.

World Cup khelh zawh takah khan Scotland hi vawi khat chak mah se group stage an paltlang zo lo a, McTominay hian match thum an khelhah bul ṭan vekin harsatna a nei lo.

Mahse August thlaa season ṭantirha Napoli-in Como an hmachhawn hnuah McTominay lung phut dan a dik lo tih hmuhchhuah a ni a, zai a ngaih dawn avangin hmalak nghal a ni.

McTominay chawlh chhungin Tartan Army (Scotland sawina) hian an coach thar atan Sebastien Pocognoli an ruai a, Belgian coach hnuaiah Napoli midfielder hi a la khel ve lo.

October thlatir lamah khan McTominay hi khelmualah a kir leh tawh a, Napoli player pawimawh ni leh tawhin Serie A-ah goal hnih a khung tawh a, a dam ṭha tawh tih a lantir.

Manchester United midfielder hlui chuan, "A hma aiin ka ṭha zawkin ka hria. Inkhelh leh theia ka awm avangin ka hlim a, a sang thei ang ber ka thleng thei tih lantir hi ka nuna thil pawimawh ber zinga mi a ni a, ka phur tawh hle," a ti.

Scotland hi zanin dar 1:15-ah North Macedonia nen an inkhel dawn a, Nations League khelh mekah Pocognoli hote hian point li hmuin pathumnaah an awm a, group stage paltlang an duh a nih chuan team nem bera ngaih an hneh hi a pawimawh ang.