Doncic-a'n Lakers chakpui leh nghal

Hliam vanga a chawlh hnuah Luka Doncic a lo kir leh tawh a, Doncic hian Atlanta Hawks laka 'double double' a siam hnuah Los Angeles Lakers chu nimin zing khan 123-112 in Milwaukee Bucks lakah a chakpui leh nghal a, point 32 score-in ani aia point score hnem an awm lo.

Fiserv Forum, Milwaukee-a inkhel tir lamah Doncic-a'n a pass uluk tawk loh avangin ball a hloh a, Lakers khel a buai dawnin a lang hman. Mahse, Doncic hian insiamrem turin hun a mamawh rei lo a, first quarter-ah point 16 a nei nghal.

Slovenian point guard hi Austin Reaves-a'n a thlawp ṭha a, damlohna avang Hawks hmachhawn thei lo Reaves-a'n a dam leh tawh tih court chhungah a lantir a, Walker Kessler a ṭangkai viau bawk.

Chutihrualin Bucks tan Tyler Herro leh Kyle Kuzma ten point an nei ve reng a, first quarter-ah Bucks hi 28-30 in a hnufual zawkah ṭang mah se, an khelh chhiat loh avangin chak turin beiseina an nei sang hle.

Second quarter tir lamah Bucks an khel ṭha zawk a, mahse, Lakers kut kal lai a tawp bik lo a, Reaves-a'n point 12 a neih bakah Sandro Mamukelashvili chuan point 10 a score a, Bucks tan Jaime Jaquez Jr. leh Brayden Burries te khel chhe lo mah se 61-50 a hnufual chungin chawlhlawk an hmang.

Third quarter-ah pawh a chungnung zawkah Lakers an ṭang chhunzawm a, second quarter-a khel tlem tak Doncic lut lehin, Bucks-in an hnaih lutuk tur venna turin three points a lut thei zel.

Doncic hian point a score loh pawhin a ṭhiante a siamsak thei zel a, Bucks-in an ven uluk bik avangin Lakers tan Ziaire Williams leh Matisse Thybulle ten hmun awl an ngah phah.

Bucks erawh ball an hloh ngun bakah an basket a tang rei hret a, third quarter tawp dawna Herro thlaktu Ryan Rollins-a'n point a rawn neih zawn nghal avangin an inthlau lutuk tur a veng.

Fourth quarter-ah Lakers-in point an score nghal mawlh mawlh a, minute ruk khelh tur la awmah point 20 zeta an inthlauh hman avangin chak tur a chiang titih tawh. Theihtawp chhuahin Bucks-in bei let mah se an inthlauhna a zau tawh a, a tawp thlenga Lakers-in hmahruaiin, 123-112 in hnehna an chang.

Chak mah se Lakers innghahna Doncic a inhliam a, an lawm a kim lo. Doncic hian fourth quarter-a three point a shoot-na lamah Kuzma keah a ṭum fuh avangin a ke rek a tina a, lakchhuah nghal niin a lut leh tawh lo.

Lakers coach JJ Redick chuan a hliam chu a serious lo a, a lo kir leh nghal tur thu a sawi thung. Doncic hian season hmasa khan hliam vanga match 65 a khelh tlin loh avangin MVP award a chân tawh a, season tir aṭanga hliamin a tlakbuak nghal a nih chuan beisei san a har ang.

November 16, Thawhṭanni zing dar 2:30 hian Lakers hian Phoenix Suns an hmachhawn leh nghal dawn a, Doncic tan hahdamna hun a awm ṭhat avangin khelh theihna chance a nei.

A inlan thei lo a nih chuan American shooting guard Reaves a mal ṭan leh a ngai dawn a, kum 28 mi Reaves hi damkawr a nih bakah Suns hi Devin Booker leh Dillon Brooks neitu an nih avangin an tawh a khirh dawn a, Doncic awm loh a hriat ang.