Verstappen-a'n a chawlh hun tur a sawi

Red Bull driver Max Verstappen chuan Formula 1-a driver ṭha ber nia a inhriat tawh loh hunah a chawlh tur thu a sawi a, tun dinhmunah pawh hian chutiang rilru chu pu lo se a chawlh tawh tur thu Brazilian Grand Prix neih hmain a lo sawi tawh.

Kum 29 mi Verstappen chuan driver ṭha ber a ni em, tih zawhna chhangin, "Ka ngaihdanah chuan a ṭha ber ka la ni a, chutiang rilru chu pu lo ila ka chawl tawh ang. Season ṭha tak ka hmang a, mahse hmasawnna tur ka la ngah hle," a ti.

Dutch driver hi tun season ṭan dawn khan F1-in dan thar an siam leh car an thlakah a lungawi lo a, driver tam tak zingah chanchinbu mite hmaa lawm lohna auchhuahpuitu langsar ber a ni. Season bul a ṭan ṭhat tawk loh avangin a chawlhsan dawn nia sawi a awm hman hial.

Mahse, Verstappen hian Red Bull tan contract thar a ziak leh tawh a, tun hnaiah hma sawnin, driver's table-ah pahnihna a ni leh tawh. Vawi thum hnehna chang tawhin vawi 12 podium a lawn tawh.

Verstappen hi a career-ah ṭum li a lo champion tawh a, mahse, nikum khan McLaren driver Lando Norris chu champion-in, kuminah Mercedes driver Andrea Kimi Antonelli chu intlansiak vawi thum la awmah a champion tawh bawk avangin, kum 2024 hnuah Verstappen hi a la champion leh lo.

Champion zo ta chiah lo mah se Verstappen hi pahnihna dinhmun luah mektu a ni a, amah el pha tura ngaih George Russell, Lewis Hamilton leh Charles Leclerc te tluk phak loha a dinhmun hi a hauh tlang thei a nih chuan, a bul ṭan dan ngaihtuahin mipui fak a hlawh ang.