Israel-in thlawhtheihna hmangin Gaza an kap leh

Israel military chuan nimin khan an indo thlawhtheihna hmangin Gaza Strip an kap tih sawiin, Palestinian thuneihna hnuaia awm Gaza aṭang hian rocket pahnih hmanga an ram beih a nih avangin thlawhtheihna hmang hian an bei let tih an sawi.

Israel sipai thupuangtu chuan thuchhuah a siamah an indo thlawhtheihna hmangin Hamas hmun an kap fuh tih tarlangin thi leh hliam an awm erawh report a ni lo thung. Hamas-te hi Ismalist Palestinian movement, Gaza thununtute an ni a, Israel-in thlawhtheihna hmanga beihpui an thlak hma hian Gaza Strip aṭangin rocket pahnih hmangin Israel hi an kap a, mahse Israel ram chin a thlen hmain tuipuiah a tla hman niin Israel sipaite chuan an sawi bawk.

Gaza aṭanga kah chhuah rocket hi eng pawl kah chhuah tih nge chiang taka hriat a ni lo a, Hamas hian an kah chhuah a nih thu an la sawi lo bawk. Hetihlai hian Israel lam hi chuan Gaza hmun aṭanga beihna an tawh zawng zawng hi Hamas tihah an puh ṭhin. Thuchhuah an siamah pawh Israel tualchhung mite beihna thleng ṭhin zawng zawngah chuan Hamas chuan a man an tel zel dawn tiin an vau zui a ni.