Mizo mipui mit fukna tur Chanmari FC leh Nagaland United
Indian Football League-ah tunkar tawp hian Mizo club Chanmari FC leh Mizo player tamna Nagaland United te an inlan dawn. Zanin dar 6:30 hian Nagaland United-in Gokulam Kerala an mikhual dawn a, November 15, Pathianni tlai dar 4:00 hian Dempo SC leh Chanmari FC te an inkhel bawk dawn. IFL hi DD Sports bakah Waves app aṭangin a thlawnin a en theih ang.
Nagaland-ah IFL
Nagaland-ah a vawi khat nan Indian Football League khelh a ni dawn a, Chümoukedima Football Stadium-ah Nagaland United leh Gokulam Kerala te an inkhel dawn. Chümoukedima hi Nagaland khawpui Dimapur aṭangin 14-15 km vela hla a awm a ni a, an stadium hi January 28, 2025 khan Nagaland chief minister Neiphiu Rio-a'n a hawng a, entu 5,000 vel lenna a ni.
IFL season ṭan hma khan Nagaland United hian Aizawl FC aṭangin IFL khelh theihna bakah CRS an lei sak a, Mizo club aṭangin player 20 contract an ziahpui. Bisons (Nagaland United sawina) IFL club thar ni mah se an player-te erawh season liam taa IFL-a tawnhriat nei sa an ni a, Mizoram Premeir League-a chher hriam an ni tawh bawk.
Nagaland United hian IFL match hmasa berah pawh Real Kashmir 3-1 in an hneh a, hemi ṭum hian bul ṭantu leh bench-a awmte pawh Mizo vek an ni. Bisons tan JH Remlala'n goal hmahruai a khung hnuah K. Vanlalhriatzuala'n goal a hnih a khung belh.
Zanina mit la tur erawh Zomuansanga a ni a dawn a, Khawbel tlangval hian MPL-ah season zawnin top scorer a ni thei a, kumin IFL-ah goal la khung lo mah se a khung thuai tura ngaih a ni. Nagaland tan hun pawimawh bik a nih avangin Naga mipuiin an ngaihven dawn a, chutihrualin Naga player an awm loh avangin mipui lawm erawh a kim lo.
Nagaland United hian Naga players panga vel ziahluh tum mah se player consent form-ah amateur an hmang a, professional hman tur a nih avangin heng Naga player-te hi nakkum January-ah chauh an khel thei ang. Tunah hian NUFC hian foreigner an la lak loh bawk avangin Mizo hlangin an khel dawn. Gokulam Kerala-ah hian Mizo player pathum C. Lalchungnunga, R. Lalbiakliana leh Lalramsanga te an
awm thung.
Chanmari tan fiahna
Chanmari FC-in Pathianni tlai dar 4:00 hian Fatorda Stadium, Margao-ah Dempo SC an hmachhawn dawn a, Mizo club tan fiahna pawimawh a ni ang. MPL champion hian match hmasa berah Shillong Lajong an chelh a, point khat an hlawh chhuak.
Dempo hi IFL club 11 zinga Mizo player awm lohna a ni a, match hmasa bera FC Bengaluru United 1-0 in an hneh bakah Samaleswari SC 2-1 in an hneh leh tawh bawk. Ghana defender Budu-a'n Bengaluru United lakah injury time-ah chakna goal a khung a, Samaleswari an hneh ṭumin Ghanian forward Richmond leh Under 22 player Laximanrao Rane ten goal an khung.
Goan club hi match zawna an chak tawh avangin inrintawkna an ngah dawn a, Mizo club tan fimkhur a ṭul dawn. Chanmari hian match hmasa berah foreigner Senegalese defender Toure bakah Brazilian midfielder pahnih Gabriel leh Denilson te bul an ṭantir nghal.
Coach Steven Dias hnuaiah Chanmari hian an ṭhat dan ber an zawng mek a, Lajong nen hian an player thar tawnhriat nei ṭha Vanlalpeka Guite pawh an la chhawr lo. Mizo club hi an squad a chhah thawkhat a, Dempo SC lakah pawh chak an tum ngam ang.