India-in semifinal khel dawn

SAFF Championship 2026 semifinal-ah India chuan vawiin chawhnu dar 2:30 hian Bhutan an hmachhawn dawn a, India team ṭha zawkin New Zealand tour an neih mek avangin Blue Tigers hi chak chiang saa dah bik an rem lo.

India hian tun international break-ah squad pahnih an nei a ni mai lo a, player ṭhenkhatin hliam vangin squad an zawm lo a, Mumbai City player pathum kohkir an ni bawk - India coach Naushad Moosa-a'n duhthlan tur a ngah lo hle.

Blue Tigers tan goal thum khung tawh Suhail Ahmed Bhat chu tlarhmaah innghahna tur a ni dawn a, tlarhnung laiah Bengaluru defender Chinglensana Singh a awm bawk.

Bhutan hi FIFA ranking-ah 192-na an ni a, India hi duhthusam squad ni lo pawh ni se an tlawm a nih chuan mualphona a tling dawn - Bhutan-ah hian 'Bhutanese Ronaldo' hminglem an pek Chencho Gyeltshen a awm a, India tlarhnung tan buaina a thlen thei ang.

Kum 30 mi forward hi I League-ah pawh Punjab FC leh NEROCA tan lo khel tawhin, ISL-ah Bengaluru leh Kerala Blasters tan a khel tawh bawk a, Indian football hrechiangtu a ni.