France ngam loh indinthar tum Italy

UEFA Nations League khelh mekah Ningani zan khan ram lian muthlu mek Italy an harh a, Zinedine Zidane-a enkawl France chu 3-1 a hnehin group A-ah hmahruaitu an ni nghal.

Italy tan Pio Esposito chuan goal hnih khungin Davide Frattesi-a'n goal khat a khung ve bawk a, France tan Michael Olise goal khung chu Italy chhaih kawlhtu mai chauh a ni.

Inkhel chu

San Siro-a inkhelah France-in goal khung turin hun an mamawh rei lo a, minute 10-na lekah Gianluigi Donnarumma pass sual chu Olise-a'n nangchingin, Alessandro Bastoni a tlan pelh hnuah an hmahruaina goal a khung.

Goal an khung hnuah Les Bleus an phur hman viau a, Liverpool forward Bradley Barcola-a'n chance nei chhunzawm ve nghal. Mahse Donnarumma a chesual duh tawh lo.

Azzurri-in siphur mah se an hnual phah lo a, an phu ang ngeiin goal an khung ve nghal. Minute 25-naah Nicolò Cambiaghi-a'n ṭha taka Malo Gusto a tlan pelh hnuah cross-in a hmun taka awm Esposito-a'n an siphurh sutna goal a khung.

Barcola-a'n chance neih chhunzawm mah se a vanneih zan a ni lo a, Italy-in goal an khung theih loh avangin 1-1 in halftime an hmang a, chak tur zawk hriatthiam mai theih a ni lo.

Beisei loh Italy

Second half-ah pawh France chu a nawrtu zawkah an ṭang hmasa a, Barcola, Rayan Cherki leh Adrien Rabiot ten chance nei mah se Italy tlarhnung an din khawng ṭhat avangin goal a lut lawk lo.

Counter attack aṭanga an nawrnaah Cambiaghi-a'n penalty a hlawh chhuak a, Pio Esposito unaupa Sebastiano-a'n inringtawk takin pet mah se goal zawnah a pet loh avangin hmahruai theihna hun ṭha a bawhpelh a, Italy an vanduai zan a ni dawnin a lang ṭan.

Mahse Azzurri hi an beidawng lo a, minute 63-naah Federico DiMarco cross chu Frattesi-a'n chiang zetin an hmahruaina goal atan a khung a, France defender te an fimkhur tawk lo.

Italy an phur zual a, France erawh an buai zel. An buaina belhchhah turin Dayot Upamecano chuan Antonio Vergara a tihtluk avangin penalty a chawi. Azzurri tan an goal hmasa ber khungtu Esposito-a'n petin a hlah ve lo a, an chak nemnghehna goal a ni zui.

Engtin zel?

Azzurri coach Roberto Mancini chuan, "Kan khel ṭha takzet a, fans te lawmna tur kan siam thei hi ka lawm hle. Tihsual palh vangin goal kan chhuah a, mahse beidawng loa kan khelh tluan theih avangin kan chak a ni. Tunah chuan Belgium nena kan inkhel turah kan insawrbing leh thei tawh ang," a ti.

Kum 1962 hnuah Italy hian an ram leilunga France an hneh lehna hmasa ber a ni a, Zidane-a'n Les Bleus a enkawl hnua hneh thei hmasa ber an nih bawk avangin result duhawm bik a ni.

France tan Kylian Mbappe chu nawmsam lohna a neih avangin squad-ah a awm lo a, Real Madrid forward tel loin goal hmaah an hriam tawk lo. Kum 27 mi Mbappe hi Pathianni zana Turkey nen an inhmachhawn hunah khelh theih tawh a beiseiawm.