Turkey tan Guler-a goal a tawk lo

Arda Guler chuan Turkey Ningani zan khan Belgium lakah freekick goal mawi tak a khung a, mahse Belgium-in goal hniha an chhanlet hnuah goal dang an khung theih tawh loh avangin, Real Madrid midfielder goal hi a tawk lo.

Gursel Aksel Stadium, Turkey-a inkhelah Guler hian minute 20-naah freekick petin, goal kilah tak mawi takin a pet kual lut a, a pet ṭhat em avangin Manchester United keeper Senne Lammens dem theih a ni lo.

Mahse Turkey hlim chhung a rei lo a, minute sarih hnu lawkah Kevin De Bruyne chuan Manchester City tana a khelhpui ṭhin, Jeremy Doku cross chu hnai tak aṭangin an siphur sut nan a khung.

Belgium an phur laklawh a, minute thum hnu lawkah Charles de Ketelaere chuan an hmahruaina goal a khung a, hun tawp thlengin goal dang a lut tawh lo a, Red Devils an chak.

Nations League khelh mekah Turkey hian match nga khel tawhin an la tlawm fai vek a, an tan knockout stage luh ngaihna a awm tawh loh avangin Pathianni zana France nen an inkhelh tur pawh an tan awmzia a awm tawh lo.