Record nen Cunningham-a'n Pistons chakpui

NBA regular season khelh mekah nimin khan tun season-a point tam berna inkhelah Detroit Pistons chuan 144-140 in Washington Wizards an hneh a, Cade Cunningham chuan point 52 zet score-in a career-a point a ngah ber ṭum a ni.

Capital One Arena, Washington-a inkhelah hian team pahnihte hun pangngaiah 112-112 in an inhnehtawk a, overtime-ah pawh an la inhnehtawk cheu avangin overtime vawi hnih khelh leh a ni a, a tawpah Pistons an dingchang.

Pistons tan Cunningham a khel ṭha tluan zak a, American point guard hian point a score hnem bakah assist 11 a nei tling a, a team chak nan a thawh hlawk hle. NBA chanchinah Cunningham hi 1977-78 hnua 'turnover' siam miah lo chunga point 50 chuang leh assist 10 aia tam nei thei hmasa ber a ni bawk.

Ausar Thompson a langsar bawk a, point 17, rebound 11 leh assist 11 neiin triple double a siam a, Daniss Jenkins (21 pts), Duncan Robinson leh Paul Reed (13 pts) ten Cunningham an thlawp ṭha hle.

Wizards an khel chhe bik lo a, Trae Young chuan point 37 leh assist 14 zet a nei a, Anthony Davis leh Alex Sarr ten point 30 ve ve score mah se an vanduai ṭum a nih avangin a tlawm zawkah an ṭang.

Kum 25 mi Cunningham chuan, "Overtime vawi hnih khelh hnuah pawh khan kan chak ka la beisei a, kan phu ang ngei result kan hmuin ka hria. Ka career-a point ka score hnem ber ṭum a ni a, ka lawm rualin team chakna hi ka ngai pawimawh zawk," a ti.

November 15, Pathianni zing dar 6:30 hian Pistons hian Miami Heat an hmachhawn leh nghal dawn a, season hmasa Eastern Conference champion hian hnehna chan chhunzawm tumin an khel leh dawn a, Cunningham a pawimawh leh ang.