Ka teammate-te ka chhuang - O'Shea

Republic of Ireland defender Dara O'Shea chuan Nations League-ah, Israel laka an khelh danah a teammate te a fak a, boruak sang taka ṭha taka an khelh theih avangin a lawm thu a sawi.

Kum 27 mi O'Shea chuan, "He team-ah hian mi ṭha tak tak an awm a, an zinga ka tel thei hi ka lawm takzet. International break hmasa zawkah khan boruak sang tak hnuaiah kan khel a, mahse ka teammate te an inthunun thei a, ka chhuang takzet a ni," a ti.

September thlaa Ireland leh Israel an inhmachhawn hmain, Ireland coach Heimir Hallgrimsson-a'n Israel chungchanga a thusawi avangin Israel an lawm lo a, an inkhelh hma hauhin khelmual pawnah boruak a sang nghal.

Israel FA chuan social media-ah chhanglet nghalin, "Khawvel leh mihringte tan hmun hrang hrangah ṭha takin hna kan lo thawk tawh a, Nobel Prize pawh kan lo dawng nual tawh. Keini pawhin âtna leh lemchang mize putute chu kan hmachhawn dawn zawk," an ti.

Ireland Football Association chuan Israel FA thuchhuah hi chhanglet tawh lo mah se, an match khelh tur hi boycott tura nawrna a awm nghal. September 21 khan Republic of Ireland team thlenna hotel pawnah nawrhna hi an lo kalpui tawh bawk.

Irish infiammi 160 aia tam chuan Israel nena inkhelh duh loh lantirin Ireland FA lehkha chhuahah hming an sign tawh a, an zingah Olympian Ciara Mageean, Republic of Ireland footballer hlui Louise Quinn, boxer Tyrone McKenna leh Eric Donovan te pawh an tel.

UEFA chuan buaina a punlun loh nan ram pahnihte inkhela an home match chu an ramah khelh a phalsak lo a, Israel chuan Nagyerdei Stadion, Hungary chu home-ah hmangin, Ireland-in TSC Arena, Serbia an hmang ve thung.

Hungary-a an inkhelh ṭum hian Boys in Green (Ireland sawina) hi 3-0 in an chak a, player te chuan 'armband' dum hreng chhuakin, hei hi Palestine an thlawpna an lantirnaah ngaih a ni.

Israel hnam-in an hnam hla an sak laiin Irish player te chu hawi chhuak loin an kun tlar a, ṭhum vawrnaah pawh Ireland captain O'Shea hian Israel captain Manor Solomon a chibai duh lo.

Skyblue and whites (Israel sawina) ṭantu tlemte te chuan inkhelh chhung zawngin Ireland chu ṭawngkam mawi lo tak takin an au el reng bawk a, mahse a tawp thlengin buaina a chhuak lo. Buaina chhuak lo mah se Serbia-a an inkhelh ṭumin fimkhur thil thuah entu awm loin an khel a, 1-1 in an inhnehtawk.

Ireland hian Pathianni zan dar 1:15 hian group G hmahruaitu Austria an tlawh dawn a, point thum chauha an inthlauh avangin hnehna an chang a nih chuan hma an hruai thei ang.