Racing Bulls tan Lindblad leh Lawson tlan zel dawn

Racing Bulls chuan an driver pahnih, Arvid Lindblad leh Liam Lawson te chu an thlak dawn lo a, kum 2027 season tharah pawh an tlan zel dawn tih an nemnghet.

RB hi Red Bull team pakhat zawk an ni a, 'main team' zawka tel tur driver thlanna atan hman a ni ṭhin. Bulgarian F2 driver Nikola Tsolov chu Lawson thlak tura hman an rilruk hman a, mahse hmang tlang turin thutlukna an siam ta zawk.

Kum 24 mi Lawson hian tun season-ah khan Red Bull driver, Isack Hadjar-a'n a kut a tihnat avangin intlansiak pathumah a aiawhin Dutch Grand Prix, Italian GP leh Spanish GP-ah a lo tlan tawh.

Lawson chuan, "Season ṭha tak kan hmang a, team-a hnathawktuten car chak zawk kan neih theih an theihtawp an chhuah a, constructor's table-a pangana kan nih phak theih nan keini pawhin ṭan kan la dawn a ni," a ti.

New Zealand driver hi driver's table-ah point 89 hmuin pakuana a ni phak a, a chung chiahin Hadjar awmin point 33 chauhin an inthlau. A teammate Lindblad chu 11-na a ni ve thung.

Season kal mekah RB driver pahnihte hian podium an la lawn lo ve ve a, Lawson hi June thlaa Monaco GP neihah khan pangana niin tun season-a a thlen san ber a ni. Monaco GP-ah vek hian Lindblad chu parukna a ni ve thung a, a thlen san ber a ni ve bawk.

Kum 19 mi Lindblad chuan, "Kumin hi F1-a ka vawi khat tlanna a ni a, thil tam tak ka hriat belh tawh avangin season thar ka nghakhlel hle," a ti.