Semifinal-ah Pegula, Gauff a tla

WTA Finals-ah Jessica Pegula chuan Wimbledon champion Linda Noskova lakah match point chhanhimin hnehna a chang a, semifinal a lut. Coco Gauff erawhin Marta Kostyuk hneh mah se knockout stage a thleng zo lo.

Group 1-ah Noskova-i'n match hmasa pahniha hnehna a chan tawh avangin semifinal a lut tawh a, Ningani zan inkhel hmasa zawkah Gauff-i'n Kostyuk 6-4, 7-5 in a hneh. American nula Gauff-i'n hnehna a chan avangin Pegula-i'n semifinal lut turin chak a ṭul tih a hria.

Pegula hian Noskova lakah set hmasa ber chu 7-6 (7-2) in a la a, set hnihna erawh Noskova-i'n 6-4 in a la thung. Set thumnaah Noskova hian match point-te nei hman mah se Pegula a tlawm duh lo a, 7-5 a lain hnehna a chang.

American nula Pegula hian ace vawi 16 a nei a, Noskova erawhin double fault vawi 15 zet a neih bakah ace vawi kua chiah a nei a, a khel ṭha tawk lo. Nizan khan group 2 lam an inkhel a, semifinal lut tawh Mirra Andreeva-a'n Karolína Muchová hmachhawnin Aryna Sabalenka leh Elina Svitolina te an inkhel bawk.