Kane record siam zanah England chak

Khawvela footballer thiam ber lawmman Ballon d'Or kawltu Harry Kane chuan Ningani zan khan England tana inlan hnem ber record a siam a, ram tan a match 126-na a khel - goal a khung bawk a, UEFA Nations League inkhelah Croatia chu 2-1 in an hneh.

Three Lions tan Morgan Rogers chuan minute 24-naah goal hmahruai a khung a, Croatia tan Petar Sucic chuan minute 59-naah si phurh sut mah se, England-in penalty an hmu a, Harry Kane chuan an chakna goal ni turin a khung.

Prince William leh a record a khum tâk, England goalkeeper ropui ṭhin Peter Shilton te aṭanga chawimawina dawngtu Kane chuan, "Football khawvelah record siam hlutzia leh ropuizia ka hria a, ka fate hmuh lai ngeia ka lem chuanna banner lian tak pawh pharh a ni te kha ropui ka ti takzet.

"Mumang piah lam ram ang mai a ni a, a hlu hle. England football zinkawnga zan chhinchhiah tlak a ni a, mahse, hamrik a rik rual khan ka rilruah hnehna chan bak a awm tawh lo," a ti a, Three Lions tana point thum hlawhchhuah chu a ngaihhlut thu a sawi.

Kum 33 mi Kane hian ram tan match 126 a khelhah goal 92 ngawt a khung tling ta der a, a khung tam ber lawr lak - amah hnaih bertu Wayne Rooney khan ram tan match 120-ah goal 53 a khung.

England hi Nations League-ah hian League A-ah group 3-ah awmin, match nga an khelhah vawi li hnehna changin, vawi khat an tlawm a, quarterfinal an lut tawh - an hneh loh awmchhun Spain nen Pathianni zan dar 1:15 hian a vawi hnih nan an inkhel leh ang.