
Zomuana goal a tawk zo lo

Inrinni zan khan Nagaland-ah a vawi khat nan Indian Football League khelh a ni a, Chümoukedima Football Stadium-ah entu 3000 chuang an pung khawm. Inkhel boruak sangah Nagaland tan Zomuansanga'n penalty aṭangin khung mah se mikhual Gokulam Kerala-in 2-1 in hnehna an chang.
Nagaland United-in foreigner an la nei lo a, Mizo hlangin an la khel chhunzawm zel. Gokulam erawhin Spanish defender Kortazar, Brazilian forward pahnih Victor da Silva leh Crislan te bul an ṭantir thung. Kerala club tan Champhai Kanan midfielder Lalramsanga a tel bawk a, inkhel bul ṭantu zingah Mizo 12 lai an awm.
Gokulam an khel ṭha a, Nagaland United an ṭang khawng viau bawk. Mahse, minute 18-naah mikhual team-in Nagaland United tlarhnung mawi takin an ṭhiat a, Crislan-a'n ṭha takin a khung. Goal dang a lut lawk lo a, hun tawp lam inkhel boruak a sang hle.
Injury time-ah substitute Sawma Tlangte-in penalty a hlawh chhuak a, referee thutluknaah Gokulam tan lawm a har ang. Khawbel tlangval Zomuana rawn pen chhuakin ṭha takin a khung a, 1-1 in a tawp mai tura ngaih a ni. Mahse, Gokulamin Nagaland United penalty hmuh aia hoin penalty an hlawh chhuak a, penalty chawitu RH Laltlanhlua a vanduai takzet. Mikhual team tan Victor da Silva-a'n mawhphurhna lain, ṭha takin a khung a, Gokulam 2-1 in an chak.
Gokulam-in match thumah chak vekin table chung berah an awm a, inkhel dangah Shillong Lajong-in Sreenidi Deccan 2-1 a hnehin, point sarih hmuin pahnihnaah an inhlang chho bawk. Real Kashmir leh FC Bengaluru United te 2-2 in an inhnehtawk a, mulaneitu Bengaluru hian minute 90-naah si phurh an sut.