India U17 an insum lo!

AFC Under 17 Asian Cup 2027 Qualifiers-ah India an chak leh ta a, Blue Colts hian an match hnihnaah Guam chu 12-0 ngawtin an sawp - India tan Singapore laka hattrick siam tawhtu Dallalmuon Gangte chuan hattrick a siam nawn a, Raj Singh Wahengbam chuan goal li a khung bawk.

India U17 tan hian Leo Thongbam, Hrishikesh Manavathi, David Irom, Felix Saikhom leh Ristik Maity ten goal khat ṭheuh an khung bawk a, Guam tan India U17 an sang lutuk hret a ni ber.

India squad-ah Mizo player panga awm mah se, captain Dallalmuon leh Malsawmtluanga te chu inkhel bul ṭan an ni a, Dallalmuon pawh hi minute 45 bak a khel lo - hattrick a siam hman tho!

Singapore laka bul ṭan, Mizo rawlthar R. Lawmsangzuala, Zoramdinthara leh Lawmsangzuala te chu hahdamtir an ni a, Thawhlehnia Palestine nen an inkhelh leh hunah chuan bul ṭan leh tawh tura beisei an ni.

India U17-in 12-0 ngawta Guam an hneh hi, AFC U17 qualifier-a India an chak chian ber dawttu a ni - kum 1984 khan India U17 chuan 13-0 in Macau an lo hneh tawh a, kum 2024 khan Brunei chu 13-0 in an hneh bawk.

AFC U17 qualifier-ah hian India hi group E-ah awmin, match hnih an khelh aṭangin point ruk an hmu ta a, Singapore, Guam, Malaysia leh Palestine te nen group khatah hian awmin, group-a a sang ber chu Uzbekistan-a khelh tur Asian Cup U17 khel tur hian an tling ang - tunah chuan India dinhmun a ṭha rih hle.