Poch-a enkawl United chak chiang

CONCACAF Nations League quarterfinal first leg-ah Manchester United manager tur Mauricio Pochettino enkawl United States chuan Haiti 6-0 in an sawp. US tan Christian Pulisic-a'n goal hnih a khung bakah Auston Trusty, Julian Hall, Weston McKennie leh Folarin Balogun ten goal khat ṭheuh an khung.

November 17, Thawhlehni zan hian United States-in Cincinnati-ah Haiti hi an mikhual dawn a, United States tan manager Mauricio Pochettino thlahna hun a ni ang. Manchester United chuan November 13, Zirtawpni khan Argentine manager Poch chu November 18, Nilaini aṭangin Head Coach a nih tur thu an puang.

Kum 54 mi Poch hian Michael Carrick a thlak dawn a, Anfield-a Liverpool (Nov 22) an tlawh aṭangin team a enkawl ṭan ang. Man United hian Reds zawh hian Sporting Lisbon (Nov 25 zan), Brentford (Nov 28), Newcastle United (Dec 2) leh Coventry City (Dec 5) te an hmachhawn chho dawn a, Liverpool zawhah team nem zawk an hmachhawn dawn avangin insiamṭhatna hun ṭha a awm thei ang.

United States hian September 2024 khan Head Coach atan Poch hi an la lut a, match 36 a enkawl tawh aṭangin match 22-ah a chakpui a, 2025 CONCACAF Gold Cup-ah final a thlenpui bakah kumin World Cup-ah last 16 a luhpui bawk a ni.

Carrick-a chhuah rualin a coaching staff-te an chhuak ve nghal a, Poch hian a hnuaia thawk sate a hruai lut dawn. Argentine manager hnuaia awm tura sawite chu Jesus Perez (assistant manager), Miguel D'Agostino (assistant coach), Toni Jimenez (goalkeeping coach), Sebastiano Pochettino (performance and sports science specialist leh Poch-a fapa) leh Silvia Tuya (physical trainer) te an ni ang.