
New Zealand lakah India an tlawm

India an tlawm leh ta - New Zealand-a tour nei mek India chuan nimin khan a vawi hnih nan mualneitu New Zealand nen friendly match an khel a, 3-0 in an tlawm.
Blue Tigers boss Khalid Jamil-a'n squad naupang zawk nen 'risk' lain New Zealand a pan a, match hnih an khelhah an tlawm ve ve - goal riat an chhuah a, goal an khung ve miah lo!
Aizawl FC coach hlui hian nimin inkhelah result thlak danglam tumin defensive game a khel a, mahse, New Zealand-in goal khung ngei tuma a tir aṭanga nawr nghalin, India an ṭang zo meuh lo a ni ber.
New Zealand tan MLS club Portland Timbers centre back Finn Surman chuan minute 22-naah goal hmahruai a khung a, minute 40-naah A-League club Wellington Phoenix left back James McGarry chuan a belhchhah zui.
All Whites hian an duhtawk mai lo - minute 43-naah Chris Wood inlar ve lehin a khung belh a, Nottingham Forest striker hian India nen an intum vawi hnihah goal a khung ve ve.
India-in first half-ah goal thum ngawt an chhuah a, second half-ah erawh an chhuah tawh lo - Mizo midfielder Lalrinliana Hnamte chu minute 59-naah luhtir niin, minute 75-naah David Lalhlansanga a lut a, inkhel hmasa zawka bul ṭan Lalremtluanga Fanai chu minute 84-naah a lut thung.
Khalid-a'n New Zealand-a zin India squad-ah hian a tirah Mizo pali ko mah se, Edmund Lalrindika chu hliam vangin a inhnukdawk a, Terina, Tluangtea leh David ten squad zawmin, match hnih an khelhah Mizo player pathumte an inlan ve ve.
Hetihlai hian Muanpuii Saiawi (IFS), High Commissioner of India to New Zealand chuan India thlenna Hotel-ah Mizo player-te a tlawh a, nimin khan an inkhel a hmunah a en bawk - a ngaihsaknaah Mizo player-te chuan lawmthu an sawi.