
SAFF final-ah India an lut

New Zealand lamah result lawmawm a awm loh laiin, SAFF Championship lamah erawh result lawmawm a awm a, India squad pakhat zawk chuan Bangladesh-a khelh mek inelnaah hian final an lut.
SAFF Championship semifinal hi Inrinni khan khelh niin, India hian 2-1 in Bhutan an hneh a, final an lut - Blue Tigers tan PV Vishnu chuan minute kuana lekah goal mawi khungin, India chu hma a hruaipui.
Blue Tigers an phur laklawh. Minute 29-naah defender Chinglensana Singh inlar ve lehin, India goal hnihna a khung a, 2-0 a ni. Mahse, India hian goal dang an khung belh leh tawh lo!
Second half ṭan aṭanga minute hnihna lekah Kinzang Tashi Tobden chuan Bhutan si phurh a sut ṭhen a, India an talbuai zui. Mahse, inkhel ṭantir lama goal hnih an lo khung tawh chu India hian chhawr ṭangkaiin, 2-1 in an chak a, final an lut.
SAFF final hi November 17, Thawhlehni zanah khelh tur niin, India hian Pakistan an hmachhawn dawn - a 'hot' dawn tih a chiang. A vawi khat nana SAFF final lut Pakistan hian inelna thlengtu leh beisei nei sang Bangladesh chu 1-0 in an hneh a, minute 86-naah Abdul Arshad chuan inkhela goal awmchhun a khung.
India leh Pakistan hi group stage-ah an lo intawng tawh a, India hian 3-2 in hnehna an chang. Mahse, tuna Pakistan team hi chu an dang tawh - kha inkhela tel lo, ram pawna khel Pakistan player pangain semifinal hmain squad an zawm a, Sheffield United midfielder Hamza Choudhury telna Bangladesh chu 1-0 in an hneh thei a ni.
Pakistan player panga, squad zawm tharte hi Swedish top division club Mjällby centre back Abdullah Iqbal, Azerbaijan Premier League club Sumgayit centre back Easah Suliman, West Brom forward hlui Adil Nabi, Danish second division club Kolding IF forward Abdul Arshad leh Swedish third division club Vasalunds IF winger Ali Khan te an ni.