Germany beisei a la bo lo

UEFA Nations League khelh mekah Germany chuan bul ṭan ṭha tawk lo mah se, Zirtawpni zan khan 3-1 in Serbia an hneh a, Greece an chak loh bawk avangin knockout stage luh an beiseina a la bo lo.

Germany lakah Serbia an vanduai a, minute thumna lekah Srdjan Babic chuan an lamah a tilut palh a, Florian Wirtz leh Brajan Gruda te chuan goal khat ve ve an khung bawk.

Serbia tan Babic chuan a tihsual siamṭhain minute 56-naah goal a khung a, Die Mannschaft lehthal turin beiseina sang tak an nei hman. Mahse minute 76-naah Vanja Dragojevic-a'n hnawhchhuah a ni a, an tan thawh chhuah ngaihna a awm tawh lo a, a tlawm zawkah an ṭang.

Jurgen Klopp-a hote lawmna siam turin Greece-in goal sarih zet an chhuah a, point hmuh zat inangah Greece aiin goal difference an nei ṭha zawk a, mahse 'head to head'-ah an hneh loh avangin pathumnaah an awm.

Chutihrualin Germany tan engkim an kutah a innghat bik lo a, zanin dar 1:15-ah Netherlands hneh mah se Greece an chak a nih chuan Klopp-a hote an tla dawn. An tlang theihna turin Greece-in Serbia lakah point an hloh a ngai a ni.